An Ghaeltacht caithréimeach i Ráth Caola agus craobh na Mumhan buaite acu

An Ghaeltacht 2-12 Achadh Bolg 1-8

Tá Craobh Idirmheánach Peile na Mumhan tugtha leo ag Cumann Caide na Gaeltachta tar éis dóibh bua seacht bpointe a fháil ar Achadh Bolg ó Chorcaigh sa gcluiche ceannais i Ráth Caola tráthnóna.

Bhí na foirne ar comhscór ag leath ama, agus cóir láidir na gaoithe ag cleas Chorcaí sa gcéad 30 nóiméad, ach léirigh fir na Gaeltachta a gcumas sa dara leath agus bhí a mbua tuillte go maith acu. Tá craobh an chúige ag an ngrád seo anois buaite acu den dara huair, ocht mbliana óna gcéad bhua sa chomórtas in 2017.

I gcoinne bhuaiteoirí chluiche ceannais Laighean, atá le himirt an tseachtain seo chugainn, a bheidh an Ghaeltacht i mbabhtaí leathcheannais na hÉireann sa mbliain nua ach is féidir leo scíth bheag a ligean idir an dá linn agus ceiliúradh a dhéanamh le linn na Nollag ar na coirn atá tugtha siar acu le cúpla mí anuas.

Ba é Pádraig Óg Ó Sé a d’aimsigh an scór deireanach den chluiche sa gcéad nóiméad d’am cúitimh, scór a bhí tuillte go maith ag fear Ard an Bhóthair tar éis dó taispeántas iontach a thabhairt ar feadh an 60 nóiméad. Níorbh é an t-aon laoch a bhí ag an nGaeltacht, áfach.

Ba dheacair dul chun cinn a dhéanamh in aghaidh na gaoithe sa gcéad leath ach d’éirigh le Brian agus Ruaidhrí Ó Beaglaoich bearnaí a aimsiú agus rinne Éanna Ó Conchúir agus Tomás Ó Sé amhlaidh sa líne lántosaithe chomh maith. Bhí Cathal Ó Beaglaoich thar barr i lár na páirce agus tionchar mór ar an imirt freisin ag a leathbhádóir Aidan Walsh, chomh maith le leithéidí PJ Mac Láimh agus Gavin Ó Cinnéide, a fuair scór dhá phointe tábhachtach ag tús an dara leath chun an Ghaeltacht a chur ar an mbóthar ceart. Tá moladh ar leith tuillte freisin ag Cian Ó Murchú sa líne lánchúil as an sár-jab a rinne sé chun naoscaire Achadh Bolg, Luke Casey, a smachtú.

Bhí a fhios ag Achadh Bolg go gcaithfeadh siad tairbhe a bhaint as an ngaoth sa gcéad leath ach d’fhág siad cúpla iarracht i mbéal an chúil sa gcéad chúpla nóiméad agus an Ghaeltacht a d’aimsigh an chéad scór, ceann an-tábhachtach.

Rinne cúl báire Achadh Bolg John Buckley sábháil iontach chun iarracht ó Thomás Ó Sé a choinneáil amach sa gcúigiú nóiméad ach bhí sé ag piocadh na liathróide amach as an eangach cúpla nóiméad ina dhiaidh sin nuair a chuir Éanna Ó Conchúir iarracht íseal thairis tar éis dó beirt nó triúr cosantóirí a chur de,

Bhí freagra maith ag Achadh Bolg. Scór dhá phointe ó John Corkery a thosaigh an teacht aniar agus bhí cúl dá gcuid féin acu go luath ina dhiaidh sin nuair a ghearr Matthew Bradley isteach ó thaobh na láimhe deise chun urchar a bhá sa gcúl lena chiotóg.

Ní rófhada a bhí an Ghaeltacht chun deiridh agus raspar eile de chúl faighte ag Ruaidhrí Ó Beaglaoich sa 12ú nóiméad. A dheartháir Brian a chruthaigh an deis arís agus is beag nár aimsigh Ruaidhrí cúl eile ceithre nóiméad ina dhiaidh sin nuair a chuaigh a iarracht díreach thar an trasnán.

D’aimsigh Cathal Ó Beaglaoich agus Gavin Ó Cinnéide pointí chun an Ghaeltacht a chur 2-3 in aghaidh 1-2 chun tosaigh ag druidim i dtreo leath ama ach chríochnaigh Achadh Bolg go láidir agus scór dhá phointe an duine aimsithe ag John Corkery agus Adam Murphy chun na foirne a chur ar comhscór ag leath ama, 2-3 in aghaidh 1-6.

D’fhéadfadh go mbeadh spreagadh faighte ón tréimhse sin agAchadh Bolg sa dara leath ach léirigh Gavin Ó Cinnéide an buntáiste a bhain le bheith ag imirt leis an ngaoth nuair a fuair sé scór dhá phointe iontach trí nóiméad isteach sa dara leath.

Chuir pointe breá ó Éanna Ó Conchúir agus cic ’45 ó Aidan Walsh an Ghaeltacht ceithre phointe chun tosaigh agus ceathrú uaire fágtha agus bhí foireann Fhergail Uí Shé le moladh as guaim a choinneáil  orthu féin in ainneoin go ndeachaigh roinnt mhaith cinntí ón réiteoir ina gcoinne.

D’aimsigh Aaron O’Sullivan an chéad scór den dara leath d’Achadh Bolg agus 48 nóiméad ar an gclog ach d’fhreagair Conchúir Ó Corrduibh ar an bpointe é le scór don Ghaeltacht. Fuair Tomás Ó Sé agus Cathal Ó Beaglaoich (scór dhá phointe) scóranna breátha go luath ina dhiaidh sin agus bhí an Ghaeltacht buíoch do shábháil iontach a rinne Seán Ó Lúing chun iarracht ó Matthew Bradley a choinneáil amach. D’aimsigh Bradley scór amháin eile d’Achadh Bolg ach ba é pointe Phádraig Uí Shé a chuir clabhsúr ar an aicsean agus 60 nóiméad anois idir an Ghaeltacht agus cluiche ceannais na hÉireann i bPáirc an Chrócaigh

An Ghaeltacht: S Ó Luing; C Ó Murchú, Rónán Ó Beaglaoich, A Mac Amhlaoibh; P Ó Sé, B Ó Beaglaoich, A Ó Beaglaoich; A Walsh (0-1, 1’45), C Ó Beaglaoich (0-3, 1dp); G Ó Cinnéide (0-3, 0-1cs, 0-1dp), Ruaidhrí Ó Beaglaoich (1-1), PJ Mac Láimh; C Ó Riagáin, É Ó Conchúir (1-1), T Ó Sé (0-1). Fir Ionaid: P P Sauerland in áit Rónáin Uí Bheaglaoich (26), C Ó Corrduibh (0-1) in áit Uí Riagáin (42), S Ó Gairbhí in áit Uí Chinnéide (48), S Ó Cuinn in áit Ruaidhrí Uí Bheaglaoich (58), C Mac Gearailt in áit Thomáis Uí Shé (63).

Achadh Bolg: J Buckley; D Merrick, C Smyth, P Dilworth; P Ring, S Tarrant, B Sullivan; C Gillespie, A Murphy (0-2, 1dp); A O’Sullivan (0-1), J Corkery (0-4, 2dp), P O’Sullivan; M Bradley (1-1), E O’Sullivan, L Casey. Fir Ionaid: Oisín O’Connell in áit Tarrant (17), D Thompson in áit Casey (35), C O’Sullivan in áit P O’Sullivan (36), Odhrán O’Connell in áit E O’Sullivan (54).

Réiteoir: Jonathan Hayes (Luimneach).