An fhoireann dheireanach peileadóirí a mba sa tír seo a saolaíodh iad ar fad…

Agus mé ag breathnú ar an gcluiche sacair idir Éirinn agus an Bhreatain Bheag Dé Domhnaigh seo caite fuair an fhiosracht an ceann ab fhearr orm nuair a dúirt an tráchtaire go raibh 45 bliain caite ó sheas foireann peileadóirí a mba sa tír seo a saolaíodh iad ar fad an fód ar pháirc na himeartha sa gcód sin.

Ní dhéarfadh duine a leithéid ar an aer gan a bheith cinnte go raibh an ceart aige mar a fuair mé amach de bharr mo chuid póirseála féin. B’in an fhoireann thuas a bhuaigh ar an Tuirc 4-0 i Réamhbhabhtaí Chraobh na hEorpa ar Pháirc Chnocán Uí Dhálaigh ar an gCéadaoin deireanach den mhí seo i 1975.

Chomh maith le bheith ag imirt ba é Johnny Giles a bhí ina bhainisteoir ar an bhfoireann, post a bhí freisin aige le West Bromwich Albion lenar bhain sé
ardú céime chuig Roinn 1 amach ag deireadh an tséasúir áirithe sin. Faoina chúram, ní baileach go raibh an rath céanna ar fhoireann na hÉireann ina bhfeachtas áit a bhaint amach i mbabhtaí ceannais mórchomórtais den chéad uair riamh.

Réamhbhabhtaí Chraobh na hEorpa a bhí i gceist i 1975. Bhuaigh siad ar an Aontas Sóivéadach agus ar an Eilvéis freisin sa mbaile ceart go leor, ach ní bhfuaireadar as a gcuid taistil ach comhscór in aghaidh na Tuirce, rud a d’fhág farasbarr pointe ag na Sóivéadaigh orthu agus áit dá réir sna babhtaí ceannais a reáchtáladh san Iúgslaiv.

Seans go mba shiocair Giles a bheith i West Brom a thug Paddy Mulligan agus Mick Martin aghaidh ar an gclub sin tar éis dóibh dornán maith blianta a bheith caite acu le Chelsea agus Crystal Palace i gcás Mulligan, agus Manchester United i gcás Martin, a chaith formhór a shaoil ina dhiaidh sin in Newcastle.

Is é Steve Heighway is dóigh an té is mó a gcuirfeadh daoine ceist faoina dhúchas, ach ba i mBaile Átha Cliath a rugadh é agus a chaith sé na deich mbliana ba thúisce dá shaol sular thug a thuismitheoirí aghaidh ar Shasana. Bhí Heighway ag tabhairt faoi chéim ollscoile agus é 23 bliain d’aois nuair a chuaigh Liverpool sa seans air. Chuaigh a chumas ráigeanna lasracha a thabhairt buailte ar an taobhlíne i gcion go mór ar lucht leanta an chumainn lenar chaith sé 11 séasúr mar imreoir agus 25 séasúr eile mar chóitseálaí.

Ba naoscaire den scoth é Don Givens ar fheil an cineál imeartha a rinne Heighway dó agus ba mhinic a bhain seisean lánleas as na liathróidí a chuirtí trasna an chúil chuige. Léirigh sé é sin luath go maith i bhfeachtas 1975 nuair a scóráil sé trí chúl sa gcéad imirt in aghaidh an Aontais Shóivéadaigh.

Scil den chineál sin a d’fhág go ndeachaigh Manchester United sa tóir ar Givens agus é ina dhéagóir . Níor fhan sé in Old Trafford ach dhá bhliain sular thug sé aghaidh ar Londain agus ar Queens Park Rangers i 1972. Ansiúd a tháinig sé faoi bhláth – scóráil sé 23 cúl dóibh an séasúr ba thúisce a raibh sé ann agus bhaineadar áit amach i Roinn 1. In imeacht trí bliana bhí 49 cúl ar fad aimsithe aige.

Faoin am ar imríodh cluiche na Tuirce i 1975 ba iad QPR a bhí ar bharr Roinn 1 (an ceann ab uachtaraí a bhí ann) agus seans ar an gcoróin acu go críoch nuair a chuaigh Liverpool tharstu i gcluiche deireanach an tséasúir.

Mheas mise i gcónaí go mba Bhaile Átha Cliathach é Don Givens – dá mba ea ní hamháin gur dúchasaigh ar fad bheadh ar an bhfoireann sin a ghabhfadh chun páirce ar an 29 Deireadh Fómhair 1975, ach foireann iomlán ‘Jeaicíní’ .

Féach go raibh dul amú orm. Ba i gcomharsanacht Chaisleán Uí Chonaill i Luimneach a saolaíodh Don i 1949. B’in an bhliain ar tháinig deireadh le ré ghlórmhar chumann iomána an cheantair, Áthán. Bhí Mick agus John Mackey ar na foirne sin ar ndóigh agus nuair a bhíodar i mbarr a réime idir 1931 agus 1948 bhuaigh siad Craobh Shinsir Luimnigh 15 uair.

Ba iománaithe as Áthán aon duine dhéag den ochtar déag a bhí ar dualgas ag Luimneach i bPáirc an Chrócaigh nuair a fuaireadar an bua ar Chill Chainnigh i gCluiche Ceannais na hÉireann i 1940 agus bhí Dan Givens, athair Don, ar dhuine acu.

Ní shin an t-aon nasc leis na Cluichí Gaelacha agus foireann sacair na hÉireann i 1975. Nuair a bhuaigh Áth Cliath Craobh Shinsir Peile Laighean i 1941 ba ógánach 18 bliain darbh ainm Con Martin a bhí i lár na páirce in éindí le Joe Mac Gearailt as Corca Dhuibhne. Níos túisce an bhliain sin bhí Martin ar fhoireann Choláiste Sheosaimh, Fionnradharc a bhuaigh craobh na gcoláistí.

An bhliain dár gcionn ba é an Gearaltach a d’ardaigh Corn Mhig Uidir in Ardán an Ógánaigh tar éis d’Áth Cliath an bua a fháil ar Ghaillimh, ach dé ná deatach ní raibh ar an Máirtíneach – ní mba ghortú ná tinneas a choinnigh as é ach scéal a rinneadh air go raibh sé ag imirt sacair le Drumcondra tráth a raibh bac i réim i gCumann Lúthchleas Gael a leithéid a dhéanamh. Go fiú agus nach bhfuair sé bonn as craobh an chúige a bheith buaite acu an bhliain roimhe sin.

Choinnigh Con Martin leis an sacar agus cúig bliana dár gcionn thug Aston Villa £10,000 air tráth arbh £5,000 lena chois sin an táille ba mhó a tugadh riamh ar imreoir. Chaith sé deich mbliana ansiúd mar leathchúlaí agus d’imir d’Éirinn deich n-uaire fichead. D’imir a mhac Mick Martin dá thír 16 uair níos minice ná sin, an cluiche in aghaidh na Tuirce ar Pháirc Chnocán i Dhálaigh ar cheann acu.

Sa mbliain 1971 a d’imir Mick den chéad uair.

B’in an bhliain freisin ar cuireadh deireadh le bac CLG, rud a chinntigh faoi dheireadh thiar thall go bhfuair Con Martin an bonn a bhuaigh sé deich mbliana fichead roimhe sin.