An craoltóir aitheanta Sorcha Ní Chéilleachair ceaptha ina ceannasaí ar Thuismitheoirí na Gaeltachta

Tá Sorcha Ní Chéilleachair, an craoltóir aitheanta de chuid RTÉ Raidió na Gaeltachta, ceaptha ina ceannasaí ar an eagraíocht Tuismitheoirí na Gaeltachta.

I ráiteas a chuir siad amach inniu, dúirt Tuismitheoirí na Gaeltachta go dtabharfadh Sorcha Ní Chéilleachair “réimse leathan taithí léi chuig an eagraíocht, chomh maith le fuinneamh agus dúthracht as cuimse”.

Is iar-leasphríomhoide bunscoile í Ní Chéilleachair a bhfuil blianta fada caite aici i mbun na hiriseoireachta agus na craoltóireachta. Tá sí 17 bliain ag obair mar chlár-reachtaire in RTÉ Raidió na Gaeltachta agus d’oibrigh sí leis an nuachtán Foinse roimhe sin. Tá cáilíocht sa phleanáil teanga chomh maith aici.

Is as Rinn Ó gCuanach i nGaeltacht na nDéise ó dhúchas di, ach tá sí ag cur fúithi ar an gCeathrú Rua i nGaeltacht Chonamara le fada, mar a bhfuil a gclann á dtógáil aici féin agus a fear céile Colm Mac Donnacha.

Fógraíodh anuraidh deontas €1,027,613 as seo go ceann trí bliana ceadaithe don eagraíocht Tuismitheoirí na Gaeltachta, a bhfuil sé de chúram orthu tacú le teaghlaigh Ghaeltachta a atá ag iarraidh a leanaí a thógáil trí Ghaeilge.

Méadú mór ab ea é sin ar an maoiniú a bhíodh ag an eagraíocht Ghaeltachta, thart ar €40,000 in aghaidh na bliana, agus aitheantas ab ea é don obair atá déanta ag an ngrúpa i measc teaghlach Gaeltachta ó bunaíodh é ar bhonn deonach in 2011.

Beidh Sorcha Ní Chéilleachair freagrach as plean oibre Thuismitheoirí na Gaeltachta a chur i bhfeidhm as seo go ceann trí bliana agus rachaidh sí i mbun a poist nua i dtús mhí na Nollag.