Rabhadh buí sneachta agus seaca fógartha don tír ar fad amárach

Tá rabhadh buí sneachta agus seaca fógartha ag Met Éireann don tír ar fad amárach agus fainic á cur go bhféadfadh cúrsaí taistil a bheith buailte ag an doineann agus na bóithre contúirteach dá barr.

Tiocfaidh an rabhadh is deireanaí i bhfeidhm anocht ag a 3.00am. Beidh sé i bhfeidhm an lá amárach ar fad go dtí a 11.00pm san oíche do chuid mhór den tír, ach beidh sé i bhfeidhm i gCúige Laighean agus i gcontaetha an Chabháin agus Mhuineacháin go dtí a 10am maidin Dé hAoine.

Fuar feannaideach a bheidh an oíche anocht agus an teocht chomh híseal leis an reophointe i gcuid mhaith den tír. Beidh sé tirim le tús na hoíche ach d’fhéadfadh corrchith gheimhriúil a bheith sa taobh thoir den tír.

Ó mheán oíche ar aghaidh tá Met Éireann ag tuar go scaipfidh báisteach, flichshneachta agus sneachta soir ó thuaidh i gCúige Mumhan agus i ndeisceart Chúige Laighean agus Chonnacht. Neartóidh an ghaoth ghoimhiúil anoir i rith na hoíche.

Amárach beidh nimh fuachta ar an maidin agus scaipfidh an bháisteach, an flichshneachta agus an sneachta soir ó thuaidh go dtí mórán chuile choirnéal den tír. Báisteach is flichshneachta is mó a bheas sa gcuid is faide ó dheas den tír amárach agus táthar ag tuar go bhféadfadh iarthuaisceart Uladh a bheith tirim.

Beidh sé fuar agus an teocht idir 0 agus 5 chéim Celsius ach goimh ghéar sa ropadh gaoithe anoir. Tá rabhadh sneachta eisithe freisin ag lucht na haimsire ó thuaidh den teorainn óna 7.00 am amárach go dtí a 2.00pm Dé hAoine.

Deir na meitéareolaithe i Met Éireann go bhfuil “ualach sneachta is flichshneachta” le feiceáil go soiléir sa gcóras aimsire agus go mbeidh sé sin ag déanamh a bhealaigh chugainn anocht agus amárach.

Táthar á thuar go bhféadfadh an cur sneachta a bheith chomh tréan le leibhéal rabhadh oráiste, idir 3 agus 10 gceintiméadar agus go mbeidh go leor sneachta ar an talamh sa leath ó dheas den tír amárach.

Tá comhairle á cur ag Oifig Pleanála Éigeandála na tíre ar thiománaithe nach féidir leo turas bóthair a sheachaint amárach a chinntiú go bhfuil sluasaid, buataisí, seaicéad feiceálach, triantán guaise, scríobán agus dí-oighreoir sa gcarr ar eagla na héigeandála.