1,318 cás nua fógartha, laghdú leanúnach ag teacht ar líon na n-othar sna hospidéil

Tá sé fógartha ag an Roinn Sláinte tráthnóna go bhfuil 75 duine eile básaithe de dheasca an choróinvíris,

Deimhníodh 1,318 cás nua den ghalar, rud a fhágann go bhfuil breis is 200,000 cás Covid-19 deimhnithe sa stát ó thús na paindéime.

Dúirt an Dr Ronan Glynn, an Leas-Phríomhoifigeach Leighis, go raibh “cloch mhíle shuntasach ghruama” eile sroichte againn.

“Caithfimid ar dhá ndícheall a dhéanamh agus scaipeadh an ghalair sa bpobal a chur faoi chois,” a dúirt sé.

Dúirt an tOllamh Philip Nolan go mbeadh líon na gcásanna níos airde sna laethanta romhainn mar go rabhthas tosaithe arís ar ghartheagmhálaithe a thástáil. Níor chóir go mbeadh díomá ar dhaoine faoi sin, a deir sé. Údar misnigh atá i ráta atáirgthe an ghalair faoi láthair, a dúirt sé.

“An-dea-scéal is ea é go léiríonn ár meastacháin go bhfuil an uimhir R i bhfad faoi bhun a haon – thart ar 0.5–0.8,” a deir an tOllamh Nolan.

“Tá cúpla seachtain chrua romhainn agus muid ag iarraidh líon na gcásanna in aghaidh an lae a thabhairt anuas faoin 1000 agus an chuma air nach bhfuil an dul chun cinn chomh maith agus a bhí. Is tábhachtaí anois ná riamh leanúint leis na hiarrachtaí agus na huimhreacha a thabhairt anuas chomh híseal le Meitheamh agus Iúil na bliana seo caite.”

1,284 othar a bhfuil an galar orthu a bhí sna hospidéil tráthnóna. Bhí 188 acusan in aonad dianchúraim, síos ó 203 inné.

Dúirt an tOllamh Nolan go raibh laghdú leanúnach tagtha ar líon na ndaoine atá á gcur sna hospidéil le Covid-19. Dúirt sé go bhfuil líon na ndaoine atá i dtuilleamaí cúram ospidéil tite go dtína leath ó thús mhí Eanáir.

Dúirt an Príomhoifigeach Leighis, an Dr Tony Holohan, gur “maith is eol dúinn” gurb iad na daoine os cionn 70 bliain d’aois is mó a d’fhulaing de bharr an Covid-19 agus gur daoine san aoisghrúpa sin is mó a chuir an galar den saol”.

Ach údar dóchais a bhí sna vacsaíní, a dúirt an Dr Holohan.

“Tá Éire i gcaoi mhaith anois; tá ar ár gcumas vacsaíní atá an-éifeachtach agus sábháilte a thairiscint do na daoine sin.”

“Tá sé léirithe gurb iad na vacsaíní mRNA atá ceadaithe in Éirinn, cinn Pfizer/BioNTech agus Moderna, is éifeachtaí agus is iad sin na vacsaíní cearta leis an gcosaint is fearr a thabhairt do dhaoine a bhfuil an 70 bliain sáraithe acu.”

An cineál nua den víreas a aimsíodh i Sasana i dtosach is cúis le 75% de na cásanna sa stát anois.

Bhain 122 de chásanna an lae inniu le Corcaigh, 93 cás a bhí i nGaillimh agus 68 cás a bhí i gcontae na Mí. 40 cás nua a bhí i bPort Láirge, 36 cás a bhí i nDún an nGall, 27 cás a bhí i Maigh Eo agus 20 cás a bhí i gCiarraí.

Bhain 428 den 1,318 cás nua inniu le Baile Átha Cliath.

Tá ráta coicíse an ghalair tite faoi bhun 400 – ráta 397 cás in aghaidh gach 100,000 duine sa stát atá i gceist anois.

Ráta 613 atá i bPort Láirge, an dara ráta coicíse den ghalar is airde sa stát.

Ráta 442 a bhí i Maigh Eo, 411 a bhí i gcontae na Mí agus 375 a bhí i nGaillimh. Ráta 338 a bhí i nDún na nGall, 324 a bhí i gCorcaigh agus 184 a bhí i gCiarraí.

De réir na bhfigiúirí is déanaí ó Roinn Sláinte an Tuaiscirt, 412 cás nua a deimhníodh inniu. Fógraíodh go bhfuil deichniúr eile básaithe sa Tuaisceart de dheasca an ghalair.

Tá 671 othar in ospidéil an Tuaiscirt a bhfuil Covid-19 orthu agus tá 68 acusan in aonad dianchúraim.

Idir 0.75 agus 0.85 atá ráta atáirgthe an ghalair, nó an uimhir R, i dTuaisceart Éireann i láthair na huaire.

Tá an chéad dáileog den vacsaín faighte ag breis is ceathrú milliún duine i ó thuaidh den teorainn go dtí seo. Tá an chéad dáileog faighte ag 263,735 duine agus an dara dáileog faighte ag 25,539.

306,381 cás a deimhníodh in Éirinn go nuige seo, 200,744 cás ó dheas den teorainn agus 105,637 cás ó thuaidh di.

5,584 duine atá básaithe in Éirinn go dtí seo de dheasca na paindéime, 3,685 duine ó dheas den teorainn agus 1,899 duine ó thuaidh di.