Thart ar 350 post sa tír seo i mbaol i gcomhlacht Meta

Thart ar 350 post sa tír seo i mbaol i gcomhlacht Meta ar leis Facebook

Thart ar 1,800 duine atá fostaithe ag an gcomhlacht in Éirinn.

D’fhógair an comhlacht tamall ó shin go raibh athstruchtúrú le déanamh ar mhaithe le costais a laghdú agus an comhlacht ag tabhairt faoi infheistíocht mhór san Intleacht Shaorga.

Tá an Príomhfheidhmeannach Mark Zuckerberg tar éis an intleacht shaorga a dhearbhú mar phríomhthosaíocht an chomhlachta agus na hacmhainní ar fad dírithe ar choinneáil suas lena chuid iomaitheoirí, leithéidí Google agus OpenAI.

Inniu a thosaigh Meta ag cur na foirne ar an eolas faoin tionchar a bheadh ag plean an chomhlachta fáil réidh le 8,000 fostaí ar fud na cruinne orthu, sin thart ar 10% dá chuid oibrithe.

Tá an 350 post atá i mbaol sa tír seo níos mó ná an 10% a raibh súil leis, 180 oibrí a ceapadh a bheadh i mbaol.

Ar fud an domhain maidin inniu thosaigh Meta ag cur oibrithe ar an eolas faoin laghdú ar an bhfoireann. Is leis an máthairchomhlacht Meta Facebook, Instagram agus WhatsApp.

Ní hé seo an chéad laghdú ar fhoireann an chomhlachta in Éirinn, tá 40% den fhoireann scaoilte chun bóthair roimhe seo. Nuair a chríochnaigh paindéim an Covid bhí 3000 ag obair sa gcomhlacht agus faoi láthair 1,800 fostaí atá aige.

Dúirt urlabhraí fiontraíochta pháirtí an Lucht Oibre, George Lawlor, gur chóir don Rialtas straitéis a fhorbairt a chosnódh postanna in earnáil na teicneolaíochta.

“Is iontach go deo an imní agus an strus atá ar gach duine atá ag obair ag Meta faoi láthair,” a dúirt Lawlor.

“Ní mór don Aire Burke oibriú le Meta lena chinntiú go dtabharfar cothrom na Féinne do gach duine agus postanna agus slite beatha a chosaint más féidir. Teastaíonn plean cuimsitheach stáit uainn ar mhaithe le postanna a mhealladh agus ioncaim oibrithe a chosaint sa gcás go dtagann meathlú ar earnáil éigin nó athrú ar an múnla gnó.”

Dúirt an Ceardchumann Seirbhísí Airgeadais (FSU), a sheasann ar son bhaill foirne Meta, go raibh an earnáil sin ag “céim chontúirteach”.

“Tá fostóirí ag déanamh cinntí faoi earraíocht a bhaint as an Intleacht Shaorga ina ngnó gan an oiliúint chuí a chur ar fáil don fhoireann agus gan maoirseacht cheart a bheith ar siúl.

“Éilíonn ceardchumainn ar fhostóirí, ar rialtóirí agus ar lucht reachtaíochta go mbeadh an próiseas trédhearcach agus go mbeadh geallsealbhóirí lánpháirteach i mbainistiú an athraithe a dhéanfaidh an Intleacht Shaorga ar an ionad oibre agus ar phostanna. D’uireasa comhoibriú dá leithéid, feicfimid tuilleadh de na fógraí seo atá againn inniu faoi dhaoine a bheith ag cailleadh a gcuid postanna.”