Príomhoidí faoi bhrú ag tuismitheoirí glacadh le tuairisc ó shíceolaithe mar bhunús do dhíolúine ón nGaeilge

Tá sé meabhraithe ag an Roinn Oideachais do scoileanna nach leor tuairisc ó shíceolaí oideachais gairmiúil le díolúine a bhronnadh ar dhalta ó staidéar na Gaeilge.

De réir tuairisc san Irish Times, scríobh an Roinn chuig príomhoidí ag míniú dóibh nach féidir díolúine a thabhairt ach amháin sa gcás go gcomhlíontar ceann de na critéir atá leagtha síos ag an Roinn do bhronnadh díolúintí, mar shampla, má bhíonn riachtanas speisialta oideachais ag dalta nó má tháinig siad chun cónaí in Éirinn ó thar lear.

Bhíodh tuairisc ó shíceolaí riachtanach chun díolúine ón nGaeilge a fháil ach athraíodh an córas sin in 2019 agus fágadh an cinneadh faoi phríomhoidí iarratas ar dhíolúine a dhéanamh.

Is léir go mbaineann tuismitheoirí úsáid as síceolaithe oideachais go fóill chun a léiriú gur cheart díolúine a cheadú dá bpáiste. Deirtear go mbraitheann príomhoidí faoi bhrú ó thuismitheoirí díolúine a cheadú nuair a fhaightear a leithéid, tuairisc a bhféadfadh costas idir €700-€800 a bheith ag baint léi.

Is chuig príomhoidí i scoileanna ina bhfuil ráta ard díolúintí á mbronnadh a scríobh an Roinn.

I gcás go mbronnfaí tuairisc ó shíceolaí ar phríomhoide, dúirt an Roinn go gcaithfí freastal ar riachtanais oideachais an dalta ar dtús agus mura dtiocfadh feabhas ar chúrsaí, go bhféadfaí smaoineamh ar iarratas a dhéanamh ar dhíolúine ansin.

Gheall an Roinn anuraidh go ndéanfaí iniúchadh ar na scoileanna is mó a bhronnann díolúintí ón nGaeilge ar dhaltaí agus scríobhadh chuig breis is leathchéad scoil mí an Mhárta ag lorg míniú ar cén fáth go raibh céatadán na ndíolúintí a bronnadh sa scoil seasta cuid mhaith níos airde ná an meán náisiúnta.

Ardú ar líon na ndaltaí a thagann thar sáile agus ar líon na ndaltaí le riachtanais bhreise is minice a luaigh scoileanna mar mhíniú.

Bhí díolúine ón nGaeilge anuraidh ag beagnach 70,000 dalta, idir dhaltaí bunscoile agus iarbhunscoile.

Mhaígh an Roinn Oideachais go ndéanfadh an córas nua a tháinig isteach in 2019 rud “annamh agus eisceachtúil” den díolúine ach tá an díolúine níos coitianta anois ná riamh.

13.4% de dhaltaí iarbhunscoile a raibh díolúine ón nGaeilge acu anuraidh, céatadán níos airde ná mar a bhí ann aon uair roimhe seo agus i bhfad níos airde ná an 2.5% a bhí i gceist aimsir na mílaoise nua.