Péint glanta den Ghaeilge ar chomhartha sráide ag Ard-Mhéara Bhéal Feirste

Thug Ard-Mhéara Bhéal Feirste air fhéin glanadh a dhéanamh ar chomhartha sráide a ndearnadh loitiméireacht ar an nGaeilge air.

Dúirt an tArd-Mhéara, Mickey Murray, gur “údar mór díomá” a bhí sa scéal go ndearnadh  loitiméireacht den dara huair le trí mhí ar an gcomhartha dátheangach do Ghairdíní an Chrainn Mhóir atá in aice le bóthar Lios na gCearrbhach i ndeisceart na cathrach.

Cuireadh péint dhearg ar an gcomhartha chun an Ghaeilge a chlúdach ionas nach mbeadh le feiceáil air ach an leagan Béarla d’ainm na háite, Cranmore Gardens.

Mí Feabhra seo caite a cuireadh in airde an comhartha nuair a cheadaigh Comhairle Cathrach Bhéal Feirste é. Rinneadh loitiméireacht ar an gcomhartha den chéad uair i mí Aibreáin nuair a clúdaíodh an Ghaeilge air le péint bhán.

Chaith na póilíní leis an eachtra sin mar choir fuatha sheicteach.

Really disappointing that the dual language street signage at Cranmore Gardens was defaced over the past couple of days, in an attempt to remove the Irish street name.

I’ve got most of it cleaned off, and I’ve asked Council to attend to give it a good clean. pic.twitter.com/arGYKS1u40

— Lord Mayor of Belfast, Cllr Micky Murray (@micky_murray) July 15, 2024

Ag tagairt dó don eachtra is déanaí, dúirt an tArd-Mhéara Mickey Murray, ó Pháirtí na Comhghuaillíochta, gur éirigh leis cuid mhaith den phéint a ghlanadh ach go gcuirfeadh sé fios ar an gComhairle chun “sciúradh maith” a thabhairt don chomhartha.

Dúirt Conradh na Gaeilge go raibh sé  “scannalach” go mbeadh ar aon duine tabhairt faoi chomhartha sráide a ghlanadh.

Faoi pholasaí Chomhairle Cathrach Bhéal Feirste, is féidir le duine atá ina chónaí ar shráid, nó comhairleoir áitiúil, achainí a dhéanamh ar son comhartha sráide Gaeilge.

Ní gá ach do 15% de na toghthóirí a chónaíonn ar an tsráid glacadh leis an mholadh ina dhiaidh sin.

I gcás Ghairdíní an Chrainn Mhóir, bhí 35 duine ar son an chomhartha dhátheangaigh agus 35 duine a bhí ina aghaidh. Níor léirigh 50 duine de mhuintir na háite aon tuairim faoin achainí.