Nach deas é? Ghearrfá an mheirg di le scian phóca

‘Tá ruibh ar an sclíteach sin,’ a dúirt fear le fear eile agus iad ag breathnú ar bhean a bhí ag tabhairt amach na dticéad i stáisiún traenach.

‘Ghearrfá an mheirg di le scian phóca,’ a dúirt an fear eile.

‘Níl sí an-dathúil ach an oiread, ní ag ceasacht ar Dhia é,’ a dúirt an chéad fhear.

‘Stopfadh sí clog, ní á roinnt léi é,’ a dúirt an dara fear.

Thugtaí ruibhseach ar bhean sula ndeachaigh MeToo ag obair. Seo é an míniú a bhí ag Tomás Ó Máille ar an bhfocal:

‘Bean aranta, challóideach, drochmhúinte. Bheadh sí ag scamhailéireacht ort. Bíonn sí géar goibéalta.’

Dúradh le Tomás De Bhaldraithe i Maínis, Conamara, gur cailín an-mhór a bheadh sa ruibhseach. Bhí an focal ruibhseachán i gCois Fharraige ar bhean ard chaol gan fuinneamh.

Chomh maith le ruibh a bheith ar bhean, nó ar fhear go deimhin, d’fhéadfadh ruibh a bheith ar dhuine freisin leis an bhfuacht; a bheith préachta nó dallraithe leis an bhfuacht, lena rá ar bhealach eile. Tharlódh sé freisin go mbeadh ruibh chainte ar dhuine.