Na Gaeil beag beann ar ‘Aoine an 13’, ach seo 40 piseog eile acu…

Comhairle do leasa más uait aon mhí-ádh a sheachaint ach má bhíonn aon imní ort maraigh cnúdán agus beidh an t-ádh ort!

Na Gaeil beag beann ar ‘Aoine an 13’, ach seo 40 piseog eile acu…

Ní raibh aon Triskaidekaphobia nó fóibe roimh an uimhir a trí déag ar na Gaeil a scríobh cuntais i mbailiúchán na Scol sna 1930idí. Bhí pisreoga go leor eile acu ach bhain a bhformhór lena gcuid oibre féin –pósadh, bás, agus obair an tí, na talún agus na farraige. Níor tháinig mé ar aon tagairt d’aon mhí-ádh ar leith a bheith ag baint leis an lá inniu. Meastar gur ón trí dhuine dhéag a bhí ag an Suipéar Deireanach nuair a braitheadh Íosa a tháinig an faitíos roimh an lá inniu.   

Comhairle do leasa más uait aon mhí-ádh a sheachaint ach má bhíonn aon imní ort maraigh cnúdán agus beidh an t-ádh ort!

  • Cuir ort do dhá stoca ar dtús sula gcuirfidh tú ort na bróga
  • Ná cuir éadach ná bróga nua ort den chéad uair gan comhartha na croise a dhéanamh orthu
  • Ná caith éadaí nua ag dul ar shochraid duit murar chaith tú ag dul ar an Aifreann ar dtús iad
  • Ná caith gúna ná cóta glas, go háirithe lá do phósta
  • Ná scuab aon salachar, agus ná caith uisce na gcos, amach as an teach san oíche
  • Ná hathraigh isteach i dteach nua ar an Satharn ná ar an Luan, ‘aistriú an Luain, ní bhíonn sé buan’
  • Ná bíodh aon deifir chun oibre ort ar an Luan mar ní mholtar ‘buille luath an Luain ná buille déanach an tSathairn’.
  • Ná deilbh(igh) aon fhlainín ar an Déardaoin ná ar an gCéadaoin, ‘ag deilbh inniu is ar an marbh a rachaidh’
  • Má bhíonn duine ag déanamh maistreadh/cuiginn i gcuinneog ar do theacht isteach i dteach, buail dreas ar an loine
  • Agus an t-im déanta, tabhair ‘goblach’ ime don chuairteoir le mí-ádh bliana ar do chuid ime a sheachaint
  • Má thugann tí braon bláthaí nó bainne don chomharsa cuir gráinnín salainn ann
  • Ná lig aon splanc amach as an teach chúns a bheas maistreadh á dhéanamh agat
  • Ná las trí rud leis an lasán céanna
  • Ná téigh ag iascach Lá Fhéile Michíl ná Déardaoin Deascabhála
  • Ná coisc comharsa ar bith ar uisce a thógáil as do thobar nó triomóidh sé
  • Ná bíodh trí sholas sa seomra céanna
  • Ná bearr do chuid ingní ná do chuid gruaige ar an Domhnach agus ná bearr in aice na tine iad
  • Ní maith é lomadh an Luain ach an oiread, don duine ná don chaora
  • Ná gabh amach ar an tsráid agus taos ar do lámha nó leanfaidh na sióga thú
  • An chéad bhéile fataí nua leag trí cinn ar an mbord agus ná hitheadh aon duine iad ach tabhair don mhadra iad i ndiaidh an bhéile
  • Má thugann tú uibheacha do dhuine cuir ceann nó dhó breise leo
  • Ná cuir cáca i dtaisce gan sceamhóg a bhaint as
  • Ná tabhair ainm ar pháiste go mbaistfear é
  • Ná pioc suas airgead rua den chosán
  • Iompaigh ar do sháil abhaile má chastar bean rua ort agus tú ag gabháil ar aistear nó ag iascach, ach má chaitheann sí cloch leat beidh tú slán
  • Iompraíodh ceathrar den aon chine corp amach as teach
  • Ná pós i mí na Bealtaine ná ar an Satharn mar nach leanann an séan é
  • Dé Luain agus Dé Máirt an dá lá is fearr le pósadh ‘anró a leanfaidh an Déardaoin, trioblóid an Aoine agus mí-ádh an Satharn’
  • Ná téadh baintreach chuig pósadh ach bíodh bean phósta ann
  • Ná caill d’fháinne pósta, an fáinne céanna a thabharfar don dara bean má bhásaíonn tú
  • Ná leanadh aon mhadra thú ag teacht ó do phósadh
  • Ná téadh fear atá ag teacht óna chleamhnas isteach i dteach mná eile
  • Maraigh trí choileach nó uascán Lá Fhéile Mártan, 10 Samhain
  • Ná cuir uimhir ré uibheacha faoi chearc ghoir
  • Má fheictear sop ag titim as tóin circe ní maith é
  • Mí-ádh an philibín a bheith ag síor-eiteall thart ar a nead de bharr gur chlis sé ar Íosa ar an gcroch.
  • Ná téadh bean ag cuartaíocht maidin Lá Nollag Beag/Lá Coille ar eagla gurbh í an chéad duine isteach sa teach sin í
  • Ná tóg teach nua ar sheanchosán agus ná cuir fad siar as do theach
  • Ná bíodh bean atá ag súil le páiste i dteach tórraimh agus an corp á chur sa gcónra
  • Gabh amach an doras céanna ar tháinig tú isteach ann

Fág freagra ar 'Na Gaeil beag beann ar ‘Aoine an 13’, ach seo 40 piseog eile acu…'