Mhúscail Pat Ryan lasair dhóchais na reibiliúnach arís ach cé a thiocfaidh ina dhiaidh?

Is dócha nár tháinig an scéal go raibh Pat Ryan ag fágáil slán lena phost mar bhainisteoir ar iománaithe sinsir Chorcaí aniar aduaidh orainn chomh mór sin.

Bhuaileas leis an Rianach don gcéad uair i 1999 nuair a bhuaigh sé Craobh na hÉireann mar imreoir lár páirce. Bhí meas agam air mar imreoir agus tá fós meas agam ar mar fhear lách dílis macánta ábalta. Sular ghlac sé leis an bpost mar bhainisteoir sinsir an chontae chruthaigh sé é féin mar bhainisteoir ag leibhéal club agus faoi aois. Bhuaigh an contae dhá chraobh faoi-20 na hÉireann faoina stiúir. Bhí na comharthaí soiléir go raibh sé in ann an chéad ghlúin eile a spreagadh.

Ba dhúshlánach a chéad fheachtas sinsearach in 2023 nuair a theip ar Chorcaigh dul chun cinn a dhéanamh i gcraobhchomórtas na Mumhan. Ach bhí toradh go luath ar a mhuinín as an óige agus a stíl ionsaitheach. In 2024, dar ndóigh, bhuadar faoi dhó ar na seaimpíní, Luimneach, agus shroich siad cluiche ceannais na hÉireann, cé gur chaill siad ar éigean i gcoinne an Chláir in am breise.

Tháinig an chéad chorn in 2025. Bhuaigh Corcaigh a gcéad Chraobh Náisiúnta Iomána ó 1998, agus ansin ghabh siad Craobh na Mumhan tar éis comórtas pocanna pionóis i gcoinne Luimnigh i gcluiche a gheobhaidh áit sna leabhair staire. Shroich siad cluiche ceannais eile na hÉireann ina dhiaidh sin, ach b’fhéidir gurbh fhearr gan mórán a rá faoin dara leath agus an géilleadh iomlán a tharla.

Seachas na torthaí féin, ba é an gaisce is mó a rinne Ryan ná muinín a thabhairt ar ais don chontae. Bhí a chur chuige ciúin, a dhílseacht dá fhoireann bainistíochta, agus a chreideamh i gcumas na hóige ríthábhachtach chun iomáint Chorcaí a athbheochan.

Ina ráiteas do na meáin, dúirt Ryan gur “turas iontach” a bhí sa tréimhse bhainstíochta agus ghabh sé buíochas le himreoirí, lena theaghlach agus le lucht tacaíochta Chorcaí. Thug CLG Chorcaí ómós ar ais dó, ag moladh an teacht aniar atá ann, a fhís agus an cultúr nua a d’fhág sé leis an bhfoireann.

Cé nár bhain sé Craobh na hÉireann amach, d’fhág sé iomáint Chorcaí níos láidre ná mar a fuair sé í le roinnt corn, móiminteam, agus an rud is tábhachtaí, dóchas. Gheobhaidh a chomharba foireann agus contae a chreideann gur féidir le Corcaigh a bheith i réim arís.

Fágann Ryan an stáitse mar an fear a mhúscail lasair dhóchais na Reibiliúnachch arís.

Ach cé a thiocfaidh ina dhiaidh? Bhuel sin an cheist ollmhór. Tá cúpla ainm luaite go minic sna páipéir agus sna meáin le cúpla lá anuas. Tá Dónal Óg Cusack, Noel Furlong agus Ben O’Connor ar bharr mórán de na liostaí, ach ar barr ar fad atá Ó Connor.

Tá Ben Ó Conchúir fós ar dhuine de na laochra is mó a bhfuil meas orthu i measc lucht leanúna Chorcaí óna laethanta imeartha le Baile Nua Sheandroma agus leis an gcontae, ach tá a cháilíochtaí don phríomhphost i gCorcaigh bunaithe go príomha ar a chuid éachtaí leanúnacha agus ar an tuiscint agus an chlisteacht a léiríonn sé ar an taobhlíne.

Bhain sé glóir amach sa chontae agus sa chúige cheana féin le Ráth Luirc ag an leibhéal idirmheánach in 2019, agus in 2021 threoraigh sé Mainistir na Corann, mar chóitseálaí, chuig craobh iomána shinsearach Chorcaí. Ceapadh é ina dhiaidh sin mar bhainisteoir ar fhoireann faoi-20 Chorcaí in 2023 agus thug sé leo an 14ú craobh uile-Éireann don chontae nuair a bhuail siad Uíbh Fhailí sa chluiche ceannais.

D’éirigh sé as an bpost sin nuair a chaill Corcaigh ar éigean in aghaidh Thiobraid Árann i gcluiche ceannais na Mumhan 2024, agus ní raibh sé i mbun bainistíocht ar bith ó shin i leith.

Tá an seans tuillte aige ach ba mhaith liom go mbeadh Cusack ann freisin. Bhí an t-iarchúl báire agus an t-anailísí gníomhach mar bhall ar fhoirne bainistíochta mionúir agus faoi-20 Chorcaí roimhe seo, agus ar aon dul lena pháirtí club Diarmuid Ó Súilleabháin, seans go mbeadh suim aige céim suas a thabhairt go dtí an príomhstáitse.

Tá súil ghéar aige agus duine neamhspleách é fad is a bhaineann sé le cúrsaí cóitseála agus b’fhéidir go mbeadh sé níos compordaí i ról den chineál sin. Bhí rath air leis an gclub sóisearach Russell Rovers, a thug sé go dtí Páirc an Chrócaigh.

Tá meas agam freisin ar Jamie Wall agus, i mo thuairim, chuirfeadh sé go mór le haon mheitheal bainistíochta. Pé duine a phiocfar ní dóigh liom gur ó thaobh amuigh den contae a thiocfaidh sé.