D’fhéadfadh an plean teangacha iasachta a mhúineadh sa bhunscoil “maolú” a dhéanamh ar “stádas na Gaeilge” sa chóras oideachais agus “sa tsochaí trí chéile” , a deirtear i dtuarascáil nua.
De réir na tuarascála comhairliúcháin nua a rinne an Chomhairle Náisiúnta Curaclaim agus Measúnachta (an NCCA) faoin dréachtchuraclam nua do bhunscoileanna an stáit, léirigh roinnt daoine imní go gcuirfeadh an plean teangacha eile a mhúineadh as do theagasc na Gaeilge.
Tá imní á léiriú le tamall ag daoine a bhíonn ag plé leis an nGaeilge sa chóras oideachais go ndéanfar an t-am a chaitear ar an nGaeilge a laghdú chun freastal ar theagasc teangacha eile.
Tá athrú suntasach ar an gcuraclam bunscoile beartaithe ag an Roinn Oideachais agus é i gceist go mbeidh teanga iasachta á foghlaim ag páistí bunscoile mar chuid den athrú sin.
Bhí roinnt daoine a ghlac páirt sa phróiseas comhairliúcháin den tuairim go gcothódh múineadh teanga iasachta feasacht faoi theangacha go ginearálta agus gur chun leas mhúineadh na Gaeilge a bheadh sé sin.
Dúradh chomh maith go gcuirfeadh an plean feabhas ar scileanna teanga, rud a bheadh chun leas na Gaeilge, agus go gcothódh sé meon níos ‘dearfaí’ i leith na Gaeilge.
Ach léiríodh imní freisin nach chun leas stádas na Gaeilge a bheadh an t-athrú.
“Bíodh sin mar atá, léiríodh imní go maolódh tabhairt isteach NTI [nuateangacha iasachta] sna bunscoileanna stádas na Gaeilge i seomraí ranga na hÉireann agus sa tsochaí ar an iomlán.
“Thairis sin, phléigh múinteoirí na deacrachtaí reatha atá acu i ndáil le dul i ngleic le Torthaí Foghlama T2 i scoileanna a fheidhmíonn trí mheán an Bhéarla. Luaigh siad go bhféadfadh an taithí a bhí acu le déanaí i ndáil le teagasc T2 difear a dhéanamh do theagasc T3 amach anseo.”
Theastaigh “dearbhú” ó dhaoine eile a ghlac páirt sa phróiseas comhairliúcháin faoin gcuraclam nua go mbeadh na háiseanna agus na hacmhainní teagaisc agus foghlama ar fad a chuirfí ar fáil i mBéarla ar fáil I nGaeilge.
Faoin bplean thosódh páistí i Rang a 3 agus Rang a 4 ag foghlaim faoi thábhacht teangacha agus i Rang a 5 agus Rang a 6 thosóidís ag foghlaim conas cumarsáid bhunúsach a dhéanamh sa teanga iasachta.
Tá imní léirithe le roinnt blianta anuas ag cigirí na Roinne Oideachais féin faoi chaighdeán Gaeilge daltaí bunscoile na tíre agus táthar buartha gur in olcas a rachadh cúrsaí dá dtosófaí ag múineadh teangacha eile agus dá dtiocfadh laghdú ar am teagaisc na Gaeilge dá réir.
Laghdaíodh breis is daichead bliain ó shin an líon ama a chaitear ar an nGaeilge sna bunscoileanna ó chúig uair an chloig go dtí 3.5 uair an chloig.
Fág freagra ar 'Imní go ndéanfaidh plean teangacha iasachta a theagasc sa bhunscoil ‘maolú ar stádas na Gaeilge’'