Tá an duais don aisteoir is fearr ag Féile Idirnáisiúnta Scannán Palm Springs buaite ag triúr Kneecap le chéile. Bronnadh an duais ar Naoise Ó Cairealláin, Liam Óg Ó hAnnaidh, agus JJ Ó Dochartaigh ag an bhféile atá ar siúl le cúpla lá anuas in California.
Rinne na moltóirí – Brian D Johnson, Marcelo Janot, agus Paola Caseslla – an cinneadh an duais don aisteoir is fearr a thabhairt, ní hamháin do dhuine amháin de na haisteoirí, ach don triúr acu in éineacht.
“[Bronntar an duais] ar Mo Chara (Ó hAnnaidh), Móglaí Bap (Ó Cairealláin) agus DJ Próvaí (Ó Dochartaigh) as an léiriú gan cháim a rinne siad mar ensemble ceoltóirí a bhí ag aisteoireacht den chéad uair in Kneecap. Bhí an léiriú chomh spleodrach is a bhí sé iontaofa sa dá réimse, agus thug siad fuinneamh úr spreagúil do choincheap na féiniúlachta cultúrtha,” a dúirt na moltóirí agus an cinneadh á fhógairt acu.
Tá go leor gradam buaite cheana féin ag Kneecap atá ainmnithe don ghearrliosta do dhá ainmniúchán Oscar– Duais an Lucht Féachana ag Féile Scannán Sundance agus seacht gcinn de ghradaim ag gradam BIFA a bhí ar siúl an mhí seo caite.
Tá ainmniúcháin faighte ag Kneecap agus saothar Gaeilge eile – Crá – do ghradaim IFTA an tseachtain seo. Seacht gcinn déag d’ainmniúcháin atá faighte ag Kneecap ar an iomlán – an gradam don scannán is fearr, don stiúrthóir is fearr, don script is fearr, agus don aisteoir is fearr, ina measc.
Tá Ó hAnnaidh, Ó Cairealláin, agus Ó Dochartaigh triúr ainmnithe don ghradam don aisteoir is fearr agus tá a gcomhghleacaithe ar an scáileán Fionnuala Flaherty, Simone Kirby, Jessica Reynolds, agus Michael Fassbender ainmnithe don ghradam don aisteoir tánaisteach is fearr.
Ainmníodh an scannán freisin sna catagóirí don roghnú aisteoirí, don chineamatagrafaíocht, don dearadh feistis, don dearadh léirithe, don ghruaig agus smideadh, don fhuaim, agus don eagarthóireacht.
Ainmníodh an dráma teilifíse Crá a craoladh ar TG4, BBC NI agus BBC4 sa gcatagóir don dráma is fearr. Is é an comhlacht Gaeltachta Fíbín a léirigh an dráma coireachta.
Fógraíodh an mhí seo caite go bhfuil Kneecap ar dhá ghearrliosta d’ainmniúcháin Oscar i mbliana – an gearrliosta don Fhadscannán Idirnáisiúnta Is Fearr agus an gearrliosta don Amhrán Nua Is Fearr. Bhí liosta deireanach na n-ainmniúchán le fógairt le déanaí ach cuireadh siar é mar gheall ar an loscadh mór atá ar siúl in Los Angeles faoi láthair.
An tseachtain seo chugainn a gheofar amach cé acu an ngabhfaidh nó nach ngabhfaidh triúr Bhéal Feirste ar aghaidh go hoíche mhór Ghradaim an Acadaimh in Hollywood.
Fág freagra ar 'Gradam eile buaite ag ‘Kneecap’ in California, 17 ainmniúchán IFTA faighte aige'