Cúram na Gaeltachta le bogadh go dtí roinn eile faoin gcéad rialtas eile – Martin

Deir an Tánaiste Micheál Martin go leagfar cúram na Gaeilge agus na Gaeltachta ar roinn eile sa chéad rialtas eile.

Ag labhairt dó le Nuacht TG4 inniu, gheall Martin, ar dócha go mbeidh sé ar an gcéad Taoiseach eile, go mbeidh an Ghaeilge agus an Ghaeltacht “i gcroílár” chlár an rialtais nua.

“Beidh an Ghaeilge agus na Gaeltachtaí i gcroílár an chláir rialtais. Beidh athruithe ar an áit ina mbeidh Aire na Gaeltachta,” arsa Martin.

Dúirt ceannaire Fhianna Fáil chomh maith go dtabharfadh an chéad rialtas eile tús áite do thoghchán Údarás na Gaeltachta a thabhairt ar ais.

Dúirt Micheál Martin, go ndéanfar athstruchtúrú ar leagan amach na ranna rialtais agus go n-aistreofaí cúram na Gaeltachta go dtí roinn eile mar chuid den athrú sin.

Faoi láthair, tá cúram na Gaeilge agus na Gaeltachta ar an Roinn Turasóireachta, Cultúir, Ealaíon, Gaeltachta, Spóirt agus Meán.

Gheall Fianna Fáil ina bhforógra toghcháin go ndéanfaí an Roinn Gnóthaí Pobail, Tuaithe agus Gaeltachta a athbhunú dá mbeidís i gcumhacht.

Bhí an Roinn Gnóthaí Pobail, Tuaithe agus Gaeltachta ann faoi rialtais Fhianna Fáil idir 2002 agus 2010.

Níor thug Micheál Martin aon ghealltanas gur ar aire sinsearach a leagfaí príomhchúram na Gaeltachta sa chéad rialtas eile, seachas é a tharmligean le haire stáit, mar atá tarlaithe i ngach rialtas ó 2011.

Faoin mbunreacht 15 aireacht rialtais atá ceadaithe agus an cheist a bheadh ann ná an roinn aisti féin a bheadh sa roinn nua. Faoin rialtas deireanach bhí gnóthaí pobail agus tuaithe istigh leis an roinn coimirce sóisialaí.

Tá aire sinsearach don Ghaeilge agus don Ghaeltacht ina éileamh le fada ag lucht feachtais ach cé gur gheall Fianna Fáil go mbeadh Gaeilge ag an aire sa roinn nua, níor thug siad aon ghealltanas nach dtarmligfí cúraimí na teanga agus na Gaeltachta chuig aire stáit arís.

Idir an dá linn, dúirt Micheál Martin agus an Taoiseach Simon Harris inniu nach raibh aon ról ag Michael Lowry maidir le socrú cé a bheadh sa chéad rialtas eile.

Tá Lowry ar dhuine den Ghrúpa Réigiúnach Neamhspleách atá i mbun cainteanna le Fianna Fáil agus Fine Gael faoi thacú le bunú comhrialtas nua.

Tá ról Lowry sna cainteanna rialtais i mbéal an phobail toisc go bhfuil comhad faoi fhiosrúchán Moriarty curtha faoi bhráid Oifig an Stiúrthóra Ionchúiseamh Poiblí.

Bhain fiosrúchán Moriarty le bronnadh an dara ceadúnas fón póca ag an stát ar an bhfear gnó Denis O’Brien agus mar chuid den iniúchadh sin fiosraíodh an caidreamh a bhí ag Michael Lowry le O’Brien.

Bhí Lowry ina aire cumarsáide agus chinn an Binse Fiosrúcháin gur roinn sé eolas le O’Brien a chabhraigh leis an ceadúnas a fháil.