Cur chuige ‘bocht’ an Aire Heather Humphreys i leith chúram na Gaeilge cáinte ag Sinn Féin

Tá “cur chuige bocht” an Aire Ealaíon, Oidhreachta, Gnóthaí Réigiúnacha, Tuaithe agus Gaeltachta Heather Humphreys i leith earnáil na Gaeilge cáinte ag an Teachta Dála Peadar Tóibín, urlabhraí Gaeilge Shinn Féin.

Thug an tAire Stáit i Roinn an Aire Humphreys, Seán Kyne, le fios do Pheadar Tóibín sa Dáil inné gur air féin, mar Aire Stáit do Ghnóthaí Gaeltachta, a thiteann “an cúram casadh le heagrais Ghaeilge agus Ghaeltachta” ach go mbuaileann an tAire Humphreys le heagraíochtaí Gaeilge mar sin féin.

“Ó ceapadh í mar Aire, mar shampla, thug an tAire Humphreys cuairteanna ar oifigí Fhoras na Gaeilge agus Údarás na Gaeltachta chun obair na n-eagras sin a phlé agus thug sí cuireadh do na heagrais Ghaeilge, Conradh na Gaeilge san áireamh, chuig Seisiún Faisnéise maidir leis an mBreatimeacht a tionóladh i mBaile an Chabháin ar an 6 Feabhra 2017.

“Anuas air sin, tá an tAire Humphreys ina ball gníomhach den Choiste Rialtais do na hEalaíona, don Ghaeilge, don Ghaeltacht agus do na hOileáin a thagann le chéile, faoi chathaoirleacht an Taoisigh, ar bhonn rialta,” a dúirt Kyne.

Ach tá an cur chuige seo cáinte ag Tóibín, a dúirt gur ionann é agus diúltú dul i ngleic le hearnáil na Gaeilge.

“Tá cúram dlí ar an Aire Humphreys san earnáil seo. Is í an glór atá ag an earnáil seo ag Bord an Rialtais agus tá sí ag diúltú scun scan casadh le heagraíochtaí Gaeilge. Níl sé sách maith go mbeadh Aire Sinsearach á scaradh féin amach óna freagrachtaí agus iad á leagan ar an Aire Sóisearach.

“Is bocht an cur i gcéill é a thabhairt le fios go raibh sí i dteagmháil le Conradh na Gaeilge mar bhí siad i láthair, mar aon leis na dosaein eagraíochtaí eile, ag cruinniú poiblí faoin mBreatimeacht. A fhad is atá sé seo ag tarlú, tá laghdú tagtha den chéad uair ar líon na gcainteoirí Gaeilge sa Stát ó na 1940idí, agus tá an Ghaeilge ar tí imeacht as i gceantair Ghaeltachta áirithe,” a dúirt Tóibín.

Ní raibh ach dhá chruinniú ag an gCoiste Rialtais do na hEalaíona, don Ghaeilge, don Ghaeltacht agus do na hOileáin, a bhfuil an Taoiseach ina chathaoirleach air, ó cuireadh tús leis an 32ú Dáil breis is bliain ó shin. Cruinniú amháin a bhí ag an gCoiste anuraidh, ar an 13 Deireadh Fómhair, agus cruinniú amháin a bhí acu i mbliana, ar an 27 Feabhra.

Bhí cruinniú den choiste beartaithe don Luan seo caite chun plé a dhéanamh ar an reachtaíocht teanga nua, ach cuireadh an cruinniú sin ar athlá. Bhí 18 mí ann idir an t-aon chruinniú a bhí ag Coiste Gaeilge an Rialtais anuraidh agus an cruinniú deireanach a bhí acu roimhe sin, ar an 30 Márta 2015.