Má bhíonn bronntanas le ceannach agat do dhuine éigin agus fonn ort ag an am céanna tacaíocht a thabhairt do dhea-thogra carthanachta ní fhéadfá rogha níos fearr a dhéanamh ná coinneal álainn de chuid an dearthóra Jo Malone a phiocadh.
Rachaidh 75% de phraghas na gcoinnle speisialta atá tagtha ar an margadh le gairid chuig Pieta House, an charthanacht a chabhraíonn le daoine a bhfuil fadhbanna meabhairshláinte acu nó a chuimhnigh ar lámh a chur ina mbás féin.
Tá cáil i bhfad agus i ngearr ar choinnle cumhra Jo Malone agus is léir go bhfuil tiomantas ar leith á léiriú ag an dearthóir ón mBreatain don chúis mhaith charthanachta seo. Go minic, ní thugtar ach sciar an-bheag den bhrabach ó tháirge don charthanacht ach ní sciar fánach den bhrabach atá i gceist anseo ach sciar suntasach den phraghas iomlán.
Seo an chéad uair ag an dearthóir ón mBreatain carthanacht as Éirinn a roghnú mar chomhpháirtí agus is cinnte gur rogha mhaith é Pieta House.
Tá obair iontach déanta ag Pieta House le seirbhísí a chur ar fáil saor in aisce i measc an phobail dóibh siúd atá faoi bhrú nó a bhfuil imní orthu faoina meabhairshláinte.
Beidh eolas ag go leor daoine faoin ócáid mhór bhliantúil a eagraíonn Pieta House faoin teideal ‘Darkness into Light’. Tá beagán €20 milliún bailithe ag an tsiúlóid bhliantúil sin ó tosaíodh í ar dtús sa bhliain 2009.
Ní raibh i gceist ach 400 duine i mbun siúil agus ag bailiú airgid an chéad bhliain i mBaile Átha Cliath ach ghlac 200,000 páirt ann anuraidh i 150 ionad i 16 tír ar fud na cruinne. Tá 240 teiripeoir lán-oilte fostaithe ag an charthanacht i 15 ionad ar fud na tíre agus chuireadar comhairle a leasa ar bhreis agus 44,000 le 13 bliain anuas.
Tharraing bunaitheoir na carthanachta, an Seanadóir Joan Freeman, tuilleadh poiblíochta ar a gcuid oibre anuraidh nuair a sheas sí i dtoghchán na huachtaránachta.
Bainfidh Pieta House leas as an airgead ar fad a thiocfaidh ó choinnle Jo Malone do thionscnamh ar a dtugtar The Resilience Academy, scéim oiliúna sé seachtaine a chuirfear ar fáil in iarbhunscoileanna na tíre le cabhrú leis an misneach agus an féinmheas a fhorbairt i ndaoine óga. Díreofar ar dhaltaí sa dara bliain iarbhunscoile agus cabhrófar leo déileáil le coimhlintí agus deacrachtaí, chomh maith le cuidiú leo fadhbanna a réiteach.
Faraor, is sa tír seo atá an ráta féinmharaithe is airde san Eoraip i measc cailíní sna déaga de bhlianta agus an dara ráta is airde san Eoraip imeasc buachaillí san aoisghrúpa sin.
Tá disléicse ar Jo Malone í féin agus d’fhág sí an scoil gan aon cháilíocht acadúil a bhaint amach. Níor stop sin í óna saibhreas a dhéanamh mar dhearthóir agus na brandaí Jo Malone London agus Jo Loves a fhorbairt.
Ceithre cinn de choinnle cumhra atá sa mbailiúchán nua seo do Pieta House, ‘White Lilac & Rhubarb’, ‘Peony & Moss’, ‘Iris & Lady Moore’ agus ‘Lily of the Valley & Ivy’.
Tá €52 an ceann ar na coinnle seo ach tá oiread airgid ag dul as sin chuig an charthanacht fhíormhaith seo gur mór is fiú é. Tá na coinnle le fáil i siopaí Brown Thomas agus Arnotts agus ar líne ó na siopaí céanna sin chomh maith le suíomh gréasáin Jo Malone London.
Fág freagra ar 'Coinnle áille Jo Malone ag tacú le hobair Pieta House'