Cluichí móra peile na deireadh seachtaine seo

Cé gur cuireadh tús le craobh peile na bliana seo os cionn mí ó shin, tá muid fós ag fanacht le cúpla cluiche a chuirfidh ruainne beochta sa samhradh. Ag breathnú chun cinn ar chuid de na coimhlintí a bheidh ar siúl an deireadh seachtaine seo, seans go dtiocfaidh athrú ar an scéal sin go luath.

Is é cath na nUltach idir Ard Mhacha agus Dún na nGall ar an Domhnach ceann de cluichí is suimiúla fós. Is follasach an bhearna idir na foirne seo ó 2011. Ó shin, tá 14 as 15 chluiche buaite ag fir Thír Chonaill, (cluiche ceannais Uladh i 2013 an t-aon cheann atá caillte acu), ach le linn na tréimhse céanna, níl ach dhá chluiche buaite ag Ard Mhacha as seacht gcinn.

Tá Kieran McGeeney tagtha isteach i mbliana agus tá dul chun cinn déanta cheana féin aige; aiseag beatha tugtha aige dá chontae dúchais. Cé gur thit siad go Roinn 3 anuraidh, bhain Ard Mhacha ardú céime amach faoi cheannas ‘Geezer’ san earrach agus tá an tuairim ann go n-éireoidh leo teacht aniar aduaidh ar fhoirne móra i rith an tsamhraidh.

Is iad Dún na nGall rogha na coitiantachta chun craobh an chúige a bhuachan ach scrúdú mór dóibh an cluiche seo ar an Domhnach, cluiche níos deacra, b’fhéidir, ná an ceann a bhuaigh siad in aghaidh Thír Eoghain cúpla seachtain ó shin. Tá cur amach níos fearr ag Dún na nGall ar fhoireann Mickey Harte – is é seo an chéad uair a casadh Ard Mhaca leo i gCúige Uladh ó 2007.

Chas siad ar a chéile i gcluiche ceathrú ceannais na hÉireann anuraidh agus tháinig Dún na nGall slán agus aon phointe amháin le spáráil acu, 1-12 in aghaidh 1-11. Bhí Ard Mhacha chun cinn le trí nóiméad fágtha ach bhí an lá le foireann Jim McGuinness a bhuí le pointí ó Michael Murphy agus Paddy McBrearty.

Tá bainisteoirí nua i bhfeighil ar na foirne ó shin agus, cé go bhfuil forbairt déanta ag McGeeney, seans go bhfuil níos mó tuisceana ag imreoirí Dhún na nGall ar céard atá ag teastáil ó Rory Gallagher.

Rogha Tuairisc.ie: Dún na nGall

Tar éis feachtas sraithe inar éirigh go maith leo, seans go bhfuil lucht leanúna an Chláir dóchasach go mbeadh siad in ann dúshlán éigin a thabhairt do Chorcaigh sa chluiche craoibhe seo ar an Domhnach. Chuirfeadh an bua in aghaidh Luimnigh coicís ó shin lena misneach ach, faraor, drochscéalta ar fad atá ann le cúpla seachtain anuas maidir le gortuithe.

As measc na seisear tosaithe a thosaigh in aghaidh Chiarraí sa gcraobh anuraidh, tá cúigear acu gortaithe don chluiche seo. Ní imreoidh Podge Collins ar chor ar bith an samhradh seo tar éis dó a ghlúin a ghortú ag imirt don Chreathlach.

Níl haon chúnamh do chás an Chláir fianaise na staire ach an oiread agus gan ach cluiche craoibhe amháin buaite acu in aghaidh Chorcaí ó 1942. Bhí bua gan choinne acu i 1997, 1-14 in aghaidh 1-13, ach sa cheithre chluiche ó shin, is le 12 phointe a bhuaigh Corcaigh ar an meán.

Níl cluiche imeartha ag foireann Brian Cuthbert ó chaill siad go trom i gcluiche ceannais na sraithe in aghaidh Bhaile Átha Cliath agus beidh siad ag iarraidh an drochthaispeántas a ruaigeadh as a n-intinn agus iad ag baile i bPáirc Uí Rinn. Tá cúpla gortú ag cur as do Chorcaigh iad féin ach ba cheart go róláidir fós don fhreasúra.

Rogha Tuairisc.ie: Corcaigh

Dé Domhnaigh, 11 Meitheamh

Craobh Peile Chonnacht – Babhta Leathcheannais

Gaillimh v Maigh Eo, Páirc an Phiarsaigh, 4i.n.

Craobh Peile Laighean – Babhta Ceathrú Ceannais

An Mhí v Cill Mhantáin, Páirc Tailteann, 3.30i.n.

An Iarmhí v Loch Garman, Páirc Uí Chíosóg, 3.30i.n.

Craobh Peile Mumhan – Babhta Leathcheannais

Tiobraid Árann v Ciarraí, Staid Semple, 3.30i.n.

Corcaigh v An Clár, Páirc Uí Rinn, 3.30i.n.

Craobh Peile Uladh – Babhta Ceathrú Ceannais

Ard Mhacha v Dún na nGall, Páirc Lúthchleasaíochta, 2i.n.

Corn Christy Ring – Babhta Cáilithe/Dícháilithe

Maigh Eo v Ros Comáin, Páirc an Phiarsaigh, 1.45i.n.