Post gan rath agus gan tairbhe a thugann Michael O’Leary ar an uachtaránacht go rialta. Níl aon tábhacht leis an bpost agus cur amú airgid atá ann, dar leis. Nach maith mar sin féin gur fiú dó a bheith ag caint ar phost an Uachtaráin agus a laghad agus a cheapann sé de? Is amhlaidh a bheidh go ceann roinnt mhaith seachtainí anois. Murab ionann agus an bhliain seo caite, ní mórán rogha toghcháin atá ann i mbliana dóibh siúd arb áil leo a bheith ag caint faoi thoghcháin agus fágann sin go mbeidh muid as seo go fómhar ag trácht ar an bhfeachtas don Áras.
Is iad Fine Gael an t-aon dream go dtí seo a bhfuil tús oifigiúil curtha acu lena bpróiseas roghnúcháin agus a bhfuil iarrthóir amháin, an t-iarChoimisinéir Eorpach Mairéad McGuinness, luaite leis an ainmniúchán le fada anois. Breathnaíonn sé rith an ráis a bheith lei anois ó chuir an Feisire Eorpach Seán Kelly é féin as an áireamh inniu. Níl aon rogha déanta ag na páirtithe eile cé go ndeir siad go bhfuil siad i mbun machnaimh. Tá súil acu duine a ainmniú le bheith san iomaíocht as seo go ceann roinnt seachtainí agus beidh cúrsaí níos soiléire faoi mhí Meán Fómhair.
An deacracht is mó do chuile dhream is ea nádúr na hoifige a bheith athraithe le fada anois. Go dtí gur toghadh Mary Robinson mar Uachtarán i 1990 agus cé is moite de Dhubhghlas de hÍde, ba le hiarrthóirí Fhianna Fáil ról an Uachtaráin. Iarrthóirí de chuid an Lucht Oibre a toghadh an dá uair nár roghnaigh an pobal iarrthóirí Fhianna Fáil. Bhí an bheirt bhan a toghadh mar uachtaráin luaite le gairmeacha eile seachas an pholaitíocht den chuid is mó cé gur chaith Mary Robinson seal sa Seanad.
Cén chaoi, mar sin, an roghnaíonn tú duine le teacht i gcomharbacht ar an mbeirt sin agus ar Mhichael D. Higgins? Tá ról an Uachtaráin athraithe ó bhonn ó toghadh é ceithre bliana déag ó shin. Airíonn pobal na tíre go bhfuil nasc acu leis an té atá tofa mar cheannasaí ar ár dtír mar thoradh ar an gcaoi ar thug seisean faoin ról. Ní raibh leisce air, ach an oiread, rud a rá faoi pé géarchéim a bhí ag crá na tíre ag aon am ar leith – géarchéim eacnamaíochta, inimirce, easpa tithíochta, ár sa Mheánoirthear. Cé go raibh roinnt saineolaithe den tuairim gur sháraigh sé cumhachtaí na huachtaránachta, dhún polaiteoirí a gcuid súl ar an mbaol sin mar gur thuig siad go mbíodh sé ag caint ar son phobal na tíre go minic.
Ciallaíonn sin go bhfuil an próiseas roghnúcháin níos casta ná mar a bhí le fada má theastaíonn ó na polaiteoirí go n-éireodh leo an toghchán seo a bhuachan. Beidh caint agus tuairimíocht go leor san aer sna seachtainí seo romhainn agus beidh sé deacair, fiú nuair a bheidh iarrthóirí roghnaithe ag páirtithe nó grúpaí éagsúla, an saghas tacaíochta a gheobhaidh siad a mheas.
Feachtas gránna, nimhneach, pearsanta a bhíonn i bhfeachtas na huachtaránachta ó thráth go chéile agus is léir go bhfuil méid áirithe doichill ar dhaoine dul chun cinn mar thoradh air sin. Ní féidir talamh slán a dhéanamh den tacaíocht a bheidh ar fáil do dhaoine bunaithe ar a ndílseacht páirtí ach an oiread. Is cróga an té a chuirfidh suim sa bhfeachtas agus a scaoilfidh a n-ainm os comhair an phobail sa bhfómhar, bíodh meas agat ar thábhacht agus fiúntas na hoifige nó ná bíodh.
Fág freagra ar 'Cé a bheadh ag iarraidh post mar Uachtarán?'