Tá borradh tagtha faoi leabhair Ghaeilge atá dírithe ar théama na Nollag le blianta beaga anuas de réir díoltóirí leabhar Gaeilge.
Deir Lisa McDonagh ón Áisíneacht Dáiliúcháin Leabhar go bhfuil méadú ar an díolachán ar leabhair Ghaeilge i mbliana thairis an t-am seo anuraidh.
“Bíonn tóir ar leabhair a bhaineann leis an Nollaig cinnte, tá méadú ag teacht ar líon na leabhar atá á ndíol faoi Nollag agus go dtí seo tá níos mó díolta i mbliana ná mar a bhí díolta an bhliain seo caite.
“Tá níos mó ar fáil ná mar a bhíodh agus sár-obair déanta ag na comhlachtaí foilsitheoireachta leo, tá na scéalta traidisiúnta ann chomh maith le cinn nua. Ceann nua do phaistí i mbliana a bhfuil an-éileamh air ná Saintí sa Bhaile le Áine Ní Ghlinn agus Mr. Ando, a insíonn céard a tharlaíonn nuair a théann sé ar ais chuig an Mol Thuaidh.”
Is le blianta beaga anuas atá an borradh seo tagtha faoi na leabhair don Nollaig a deir Gráinne Ní Mhuilneoir, Bainisteoir An Siopa Leabhar i mBaile Átha Cliath. Bhí ganntanas den chineál seo leabhar ann nuair a thosaigh sí féin ina ról sa mbliain 2018.
“Ní bhíodh ach dornán teideal ar fáil. Le cúpla bliain anuas tá cúpla teideal úr i ndiaidh teacht amach gach bliain agus faoin dtráth seo tá rogha dheas ann.”
Feictear do Ní Mhuilneoir go dtagann méadú ar an éileamh de réir mar a bhíonn an geimhreadh ag teacht.
“Ag tosú i mí na Samhna bíonn fonn ar dhaoine léamh faoin Nollaig, faoi na nósanna a bhaineann léi agus faoi charachtair aitheanta a shamhlaítear leis an bhféile, go háirithe Daidí na Nollag do na gasúir.
“Go ginearálta, measaim gur maith le daoine a bheith ag léamh le linn an gheimhridh agus an dorchadas timpeall orainn – is fearr liom féin fanacht sa bhaile le blaincéad agus cupán tae agus tabhairt faoi leabhar ná dul amach!”
Filleann daoine i gcónaí ar na clasaicí, a deir Ní Mhuilneoir, agus bíonn tóir freisin ar na teidil nua gach bliain.
“I measc na leabhar do dhaoine fásta, bíonn tóir i gcónaí ar An Nollaig Thiar le Breandán Ó hEithir, agus Duan na Nollag – A Christmas Carol atá aistrithe go Gaeilge ag Maitiú Ó Coimín. I mbliana tá an leabhar nua Scéalta Nollag le Alan Titley ag eitilt amach as an siopa.”
Ó thaobh leabhair do pháistí óga, is deacair Bran a bhualadh, a deir sí.
“Bran agus an Nollaig ar an leabhar Nollag is mó a mbíonn tóir air anseo, leabhar cairtchláir agus flapaí ann.”
Chomh maith leis sin bíonn Cuairt san Nioclás ag barr an liosta ó tháinig sé ar an bhfód ach tá borradh faoi leabhair Nollag do dhaoine óga a scríobhadh i nGaeilge le blianta beaga anuas, a deir Ní Mhuilneoir.
“Daidí na Nollag agus Saintí sa Bhaile le hÁine Ní Ghlinn agus Mr Ando go háirithe, agus le déanaí tá leabhar Nollag eisithe ag Picnic Press, An Nollaig le Teidí le Sadhbh Rosenstock agus Ciara Ní Dhuinn a bhfuil an-éileamh air. Bíonn tóir ar An Nollaig Thuas le hAoife Ní Dhufaigh.”
“Is deas iad na leabhair seo mar is féidir iad a léamh go minic i mí na Nollag, agus iad a phacáil suas leis na maisiúcháin le teacht orthu arís an chéad bhliain eile. Níl an oiread sin ann do pháistí atá beagáinín níos sine, ach sin an cás le leabhair i nGaeilge go ginearálta.”
Bíonn tóir ag an bpobal i gcónaí ar leabhair a bhaineann leis an Nollaig, a deir Deirdre Ní Thuathail, bainisteoir shiopa leabhar Chló Iar-Chonnacht. Feiceann sí éileamh ar leabhair ar théamaí áitiúla chomh maith aimsir na Nollag.
“Tá níos mó den chineál sin leabhair á bhfoilsiú le cúpla bliain anuas agus tá rogha mhaith ar fáil anois. Bíonn éileamh i gcónaí ar leabhair dhathúcháin ar théama na Nollag agus ar chluichí ar nós ‘Snap Nollag’ agus a leithéid.
“Bíonn éileamh ag an bpobal áitiúil ar leabhair a bhaineann le téamaí áitiúla, agus déanann muid iarracht i gcónaí leabhar den chineál sin a bheith foilsithe againn roimh na Nollag.”
I mbliana tá éileamh mór ar An Ghluaiseacht: Scéal Chearta Sibhialta na Gaeltachta le Rónán Mac Con Iomaire agus an leabhar Sáinnithe: Scéal Íobartaigh le Peadar G. Ó Máille freisin.
“Ceannaíonn daoine nach gceannódh leabhar Gaeilge de ghnáth, leabhair den chineál sin,” a deir Deirdre Ní Thuathail.
Tá an scéal amhlaidh i mBéal Feirste agus borradh faoi leabhair do pháistí faoi Nollaig feicthe ag bainisteoir an tsiopa leabhar An Ceathrú Póilí, Áine Nic Gearailt. Bíonn ‘síor-ráchairt’ ar an bpictiúrleabhar Bran agus an Nollaig a deir Nic Gearailt, chomh maith le réimse pictiúrleabhar eile do pháistí ar théama na Nollag.
“Is cinnte go bhfuil borradh faoi leabhair do pháistí a fhoilsítear ag an am seo bliana, cuid acu dírithe ar théama na Nollag. Tchí tú custaiméirí sa tsiopa ag díriú ar theidil a bhfuil an Nollaig luaite iontu nó pictiúr de dhaidí na Nollag nó íomhánna Nollaigiúla le feiceáil ar na clúdaigh.
“Bíonn tóir cuid mhaith fosta ar earraí ar nós meirgí, cártaí, agus crochadáin a bhfuil ‘Nollaig’, ‘Nollaig shona’ srl scríofa orthu.”
Léitheoir
Dea-scéala é seo gan amhras, agus i bhfianaise an ailt a scríobh Darach Ó Scolaí faoi mhaoiniú na bhfoilsitheoirí an mhí seo caite, is cinnte gur cheart do na heagrais Ghaeilge an fhianaise seo a úsáid chun tuilleadh airgid a fháil d’earnáil na leabhar.