Súil siar ar ghaiscí na bhfoirne Gaeltachta in 2015

An Ghaeltacht buacach sa mbaile ach is iad an Daingean ríthe an chontae

Cuireadh tús maith leis an mbliain i gCorca Dhuibhne nuair a bhuaigh buachaillí na Pobalscoile Corn Uí Mhuirí den cheathrú huair as a chéile. Chuaigh siad ar aghaidh ansin chun Corn Uí Ógáin a bhuachan, mar a rinne in 2014. B’iontach an gaisce é agus chuir na himreoirí céanna sméar mhullaigh ar an mbliain lena gclubanna ina dhiaidh sin.

Bhí scata acusan páirteach i mbua iontach an Daingin i gCraobh Mionúr an Chontae agus tús mhí na Samhna. B’iad a bhuaigh an chraobh anuraidh chomh maith agus rinne buachaillí an Daingin éacht arís i mbliana agus bua trí phointe acu ar Chiarraí Láir leis an scór 0-10 in aghaidh 1-4. I measc na n-imreoirí, bhí triúr, Conor Geaney, Mark O’Connor agus Tom O’Sullivan, a bhí ar fhoireann mionúr Chiarraí a bhuaigh Craobh na hÉireann chomh maith.

Tháinig bua an Daingin sa chraobh mionúr cúpla seachtain i ndiaidh don chumann éacht eile a dhéanamh agus Craobh Sinsear na gClub buaite acu. Is iad Na Crócaigh a bhí roimh an Daingean, agus a gceathrú chraobh as a chéile á lorg ag fir Chill Airne. Cuireadh stop leo, áfach, agus bua ceithre phointe ag an Daingean, 2-12 in aghaidh 0-14.

Ní drochbhliain a bhí ann don Ghaeltacht ach an oiread agus beidh siad sásta gur éirigh leo ardú céime suas go Roinn 2 den tSraith Sinsear agus Craobh Sinsear Chiarraí Thiar a bhuachan den chéad uair ó 2008. Bhuaigh siad ar an Daingean sa chluiche leathcheannais sula bhfuair siad an ceann is fearr ar Abhainn an Scáil sa chluiche ceannais. B’iad na cumainn chéanna a d’imir sa chraobh sóisear áitiúil agus ba le fir na Gaeltachta an lá sa chluiche sin chomh maith.

Fir na nGleannta i mbarr a réime i nDún na nGall

Cúig bliana tar éis dóibh an chraobh a bhuachan den uair dheireanach, b’iad Naomh Conaill curadh Chraobh Sinsear Dhún na nGall do 2015. Fuair fir na Galetachta an ceann is fearr ar Naomh Adhamhnáin sa chluiche ceannais, foireann a bhfuil taithí mhaith acu ar Chorn Mhic Uidhir a bhuachan le blianta beaga anuas. Ní raibh ach pointe amháin, 0-11 in aghaidh 0-10, idir na foirne ag an deireadh agus fir na nGleannta ag ceiliúradh i ndiaidh dianchoimhlinte.

Seachtain tar éis an bhua sin, bhuaigh Naomh Conaill Craobh Sinsear Comórtas Peile na Gaeltachta. Beagnach cúig mhí tar éis do na cluichí ceannais a bheith curtha ar athló, bhí bua 1-11 i gcoinne 0-6 ag Naomh Conaill ar Chill Chartha. Is beag nár thug an cumann Craobh Mionúr A an chontae leo chomh maith ach bhuaigh Naomh Adhamhnáin orthu, 3-6 in aghaidh 0-12, sa chluiche ceannais sin. Theip ar fhoireann Gaeltachta eile an chraobh B a bhuachan nuair a bhuaigh Baile na nGallóglach ar Chill Chartha i gcluiche ceannais an chomórtais sin.

I gcomórtais na mban, beidh Gleann Fhinne tinn go maith ag féachaint ar an Tearmann agus cluiche ceannais sinsear an chontae caillte acu ina n-aghaidh den tríú huair le trí bliana anuas. Ba é seo an ceathrú craobh as a chéile atá buaite ag mná an Tearmainn agus chun rudaí a dhéanamh níos measa do Ghleann Fhinne, is iad an Tearmann a bhuaigh orthu i gcluiche ceannais Chomórtas Peile na Gaeltachta i mbliana chomh maith.

Iománaithe Gaeltachta na Gaillimhe ag taispeáint a mianaigh

Beidh iománaithe agus peileadóirí Mhaigh Cuilinn ar ais ag imirt i ngrád na sinsear an bhliain seo chugainn tar éis don dá fhoireann ardú céime a bhaint amach.

Cé gur theip orthu sa chluiche ceannais Idirmheánach in aghaidh Mhainistir Chnoc Muaidhe, beidh na hiománaithe ag glacadh páirte sa ghrád nua, Sinsear B i 2016.

Bhí níos mó rath ar pheileadóirí an chumainn, a bhuaigh ar Bhaile Átha an Rí chun Craobh Idirmheánach Peile na Gaillimhe a bhuachan. Cé go ndeachaigh siad ar aghaidh chun Craobh Idirmheánach na hÉireann a bhuachan in 2008, chlis orthu i gcluiche ceannais Chonnacht i mbliana in aghaidh Mhaolla-Na Ceathrún Móire, as Mhaigh Eo.

Beidh foireann ó Chonamara ag tógáil áit iománaithe Mhaigh Cuilinn sa Chraobh Idirmheánach tar éis don Spidéal Craobh Sóisear A na Gaillimhe a bhuachan cúpla lá roimh an Nollaig. Ba in aghaidh Ard Raithín a bhí fir Chois Fharraige sa chluiche ceannais agus bua breá ag fir an Spidéil, mar a bhí acu freisin i gCraobh Sóisear B Peile na Gaillimhe nauir a bhuaigh siad ar Mhílic-Dhún an Uchta ag deireadh mhí Dheireadh Fómhair.

Bhí rath ar fhoirne Chonamara sna comórtais Faoi-21 peile chomh maith agus an Cheathrú Rua agus Naomh Anna, Leitir Móir ag buachan chraobhacha A agus B an Iarthair faoi seach. Bua stairiúil a bhí ann don Cheathrú Rua nuair a chloígh siad Bóthar na Trá-Cnoc na Cathrach. Ba é an chéad uair é ag an gcumann Gaeltachta an comórtas seo a bhuachan.

Ar an drochuair, cuireadh cluiche ceannais an chontae, ina dtabharfaidh siad aghaidh ar Chora Finne, siar go dtí an bhliain nua mar gheall ar an drochaimisir. Ní raibh an t-ádh ach an oiread ar Naomh Anna, iad ag cailleadh amach ar Chraobh B an Chontae nuair a fuair Áth Cinn an ceann is fearr orthu sa chluiche ceannais sin.

Beidh díomá ar roinnt d’fhoirne Gaeltachta na Gaillimhe i mbliana. Bhí mí-ádh ar chumann Mhicheál Breathnach cluichí ceannais san iomáint (Sóisear 1) agus sa pheil (Sóisear A) a chailleadh agus beidh peileadóirí na Fairche ag imirt sa ghrád Sóisear A in 2016 tar éis dóibh ísliú céime a bheith tugtha dóibh sa chraobh Idirmheánach.

Is ar éigean a d’éalaigh Oileáin Árainn ón dícháiliú sa ghrád céanna ach ar a laghad chríochnaigh siad an bhliain go buacach agus Craobh Sóisear Comórtas Peile na Gaeltachta buaite acu don dara bliain as a chéile tar éis dóibh an ceann is fearr a fháil ar na Dúnaibh in Ard an Rátha.

Ceiliúradh go leor le déanamh ag Béal Átha’n Ghaorthaidh an Nollaig seo

Ba bhliain mhaith a bhí ann d’fhoirne na Gaeltachta i gCorcaigh i mbliana, go háirithe do chumann Bhéal Átha an Ghaorthaidh, ar éirigh lena bhfoirne sóisear agus mionúr craobhacha an chontae a bhuachan.

Níor stop siad ag ceiliúradh sa chumann idir mí Dheireadh Fómhair agus mí na Samhna agus Sraith Sóisear B an Chontae, Craobh Sóisear B an Chontae, Craobh Mionúr C an Iarthair, Sraith Sóisear Mhúscraí agus Craobh Mionúr C an Chontae buaite ag foirne Bhéal Átha an Ghaorthaidh sa tréimhse sin.

B’iad na buanna craoibhe na gaiscí ba mhó atá á lua leo, na mionúir ag fáil an ceann is fearr ar Chill Dairbhre i gcluiche neamhghnách a chríochnaigh 6-9 in aghaidh 5-7. Ag tús na míosa a bhuaigh na sóisir craobh an chontae agus bua acu ar Bhaile na Corra, 1-14 i gcoinne 0-14.

Bhí Cill na Martra iad féin ag ceiliúradh mar churaidh an chontae chomh maith agus Craobh Faoi-21 B Chorcaí buaite acu i mí Lúnasa. Ba ar Chill Mhín a bhuaigh siad sa chluiche ceannais, agus buachaillí Mhúscraí tagtha slán le pointe amháin, 2-11 in aghaidh 1-13.

Cé gur cháiligh foirne idirmheánach Chill na Martra agus Naomh Abán do chluichí ceannais sraithe, i Roinn 3 agus Roinn 2 faoi seach, in 2015, níor éirigh le ceachtar foireann an corn a thabhairt leo. Ar a shon sin is uile, ó tharla gur bhain an dá fhoireann ardú céime amach, ní hé deireadh an domhain é.

Clann na nGael ag déanamh dul chun cinn leis an gcamán

Is bliain den scoth a bhí ann d’iománaithe Chlann na nGael sa Mhí agus Craobh Idirmheánach, Mionúr B agus Faoi-21 B an Chontae buaite acu i 2015. Ba é bua na foirne idirmheánaí an ceann is drámatúla, agus iad ag fáil an ceann is fearr ar Wolfe Tones i ndiaidh athimeartha.

Bhí an t-am caite nuair a d’aimsigh siad an pointe chun comhscór a bhaint amach sa chéad chluiche ach ba mhó fós an gaisce a rinne siad san athimirt nuair a scóráil siad dhá chúl sa chúpla nóimeád deireanach chun an chraobh a sciobadh ó Wolfe Tones.

Ní iománaithe an chumainn amháin a bhí ag ceiliúradh in 2015 agus Craobh Sóisear D na Mí buaite ag peileadóirí Chlann na nGael ag deireadh mhí Lúnasa.