Cuirfear i gcré na cille i gConamara inniu Nóra Ghriallais Bean Mhic Dhonncha, duine de mhóramhránaithe sean-nóis na hÉireann.
Ba í Nóra, arbh as Muiceanach Idir Dhá Sháile di ó dhúchas, banríon an tsean-nóis mar go ndearna sí éacht nach ndearna aon bhean eile go fóill, bhuaigh sí Corn Uí Riada trí huaire: sa Daingean i 1987, i nGleann Cholmcille i 1989 agus i nGaillimh i 1993.
Aitheantas a bhí san onóir sin don mháistreacht agus an mhuinín as an ngnáth a bhí ag Nóra as an amhrán agus as a dúchas ceoil féin agus an t-anam agus an nádúr a bhí ina cuid fonnadóireachta.
Bhí Nóra ar dhuine den dáréag clainne a bhí i dteaghlach ceolmhar mhuintir Ghriallais a bhfuil a gcáil i bhfad is i ngearr as a gcumas fonnadóireachta.
Bhain beirt deirfiúracha léi Corn Uí Riada chomh maith, Sarah agus Nan.
Mar a rinne a lán dá haois thug Nóra a haghaidh ar Bhoston Mheiriceá agus is ann a phós sí fear as Conamara, Colm Mac Donncha. Nuair a tháinig siad abhaile chuir siad fúthu sna Foraí Maola sna Forbacha agus bhí teach ósta cáiliúil ‘An Púcán’ á reáchtáil acu i lár chathair na Gaillimhe.
Bhíodh fáilte roimh cheol is amhráin sa teach ósta agus an-tarraingt ann ag muintir Chonamara.
Bhí Nóra tinn le tamall agus í buailte ag an ngalar Alzheimer, agus seachas bláthanna a chur ar a sochraid moltar síntiús a thabhairt don eagraíocht a thugann tacaíocht do dhaoine a mbíonn an galar sin ag cur as dóibh féin agus dá dteaghlaigh. I mí na Samhna anuraidh a bhásaigh a deirfiúr Nan Ghriallais, amhránaí cumasach eile.
Maireann a fear Colm, a beirt iníonacha agus a mac chomh maith le cuid mhór gaolta agus cairde. Beidh Aifreann na sochraide i séipéal Bhearna inniu ag meán lae agus adhlacfar a corp i reilig na bhForbacha tar éis an aifrinn. Cór na n-aingeal go gcoinní ceol léi ar Neamh.
Mícheál ‘Ó hAodha
Ar dheis Dé go raibh sí (RIP)
Mícheál
Bibi
Beannacht Dé lena h-anam
Pól Ó Braoin
Go gcloistear a cuid amhránaíochta sna flaithis.
An Teanga Bheo
Brón ar an mbás, i dteampall Dé go raibh sí linn i gconaí