Mná Naomh Anna agus Laochra Bhéal Feirste le feiceáil i sraith nua TG4

Cuirfear tús leis an dara sraith den chlár Ár gClub ar TG4 anocht agus cumann Gaeltachta agus cumann lán-Ghaeilge faoi chaibidil sa tsraith nua.

Díreoidh an tsraith ar na pobail lena mbaineann siad agus ar na heachtraí a thit amach i dtrí chumann éagsúla in 2019, Naomh Anna, Leitir Móir i nGaillimh, Laochra Loch Lao i mBéal Feirste, agus Ráth an Iúir i Loch Garman.

Thuill an chéad sraith den chlár, a craoladh anuraidh, moladh as an léargas a thug sé ar an mbród, an dílseacht agus an tsuim a chothaíonn an club CLG i measc an phobail.

I gConamara, díreoidh an tsraith ar fhoireann pheile na mban Naomh Anna agus iad ag imirt i nGaillimh. Leanfar beirt imreoirí ón gcumann freisin, Sarah Ní Loingsigh agus Ríona Ní Fhlatharta, agus iad mar chuid d’fhoireann shinsir pheile an chontae a bhí páirteach i gcluiche ceannais na hÉireann chomh maith.

I mBéal Feirste, casfar le baill de Laochra Loch Lao, an cumann lán-Ghaeilge a tháinig ar an bhfód i gceart in 2017. Rachaidh lucht an chláir ina dteannta go dtí Comórtas Peile na Gaeltachta a reáchtáladh i gCorca Dhuibhne. Casfar le duine an-speisialta de lucht tacaíochta na Laochra, Daithí Mac Gabhann, agus an cumann ag iarraidh aird a tharraingt ar an bhfeachtas atá ar bun maidir leis an tábhacht a bhaineann le deonú orgán.

Buailfear i Loch Garman le Clár Ní Conchúir, bean a bhuaigh Craobh Camógaíocht na hÉireann trí huaire le foireann an chontae. Tá Clár ag iarraidh filleadh ar fhoireann Ráth an Iúir tar éis di páiste a bheith aici agus é mar sprioc aici imirt lena cuid deirfiúracha ar feadh bliain amháin eile.

Sé chlár san iomlán atá i gceist sa tsraith nua atá déanta ag an gcomhlacht léiriúcháin Aniar do TG4. Craolfar an tsraith ag 8pm gach Dé Máirt.