Gradam ‘Lóchrann’ le bronnadh ar Mhicheál Ó Muircheartaigh ag Comórtas Peile na Gaeltachta

Fógraíodh tráthnóna go bhfuil Gradam ‘Lóchrann’ Údarás na Gaeltachta le bronnadh ar an gcraoltóir aitheanta Micheál Ó Muircheartaigh. Is ag Comórtas Peile na Gaeltachta, atá á reáchtáil i dTuar Mhic Éadaigh an deireadh seachtaine seo chugainn, a bhronnfar an gradam ar an gcraoltóir iomráiteach as Dún Séann i gCorca Dhuibhne.

Tá an t-aitheantas seo á thabhairt d’Ó Muircheartaigh as an tacaíocht ar leith atá tugtha aige do Chomórtas Peile na Gaeltachta, do na cluichí Gaelacha trí chéile, don Ghaeilge agus don chultúr Gaeltachta.

Thug Ó Muircheartaigh os cionn 60 bliain ag tráchtaireacht ar chluichí CLG ar RTÉ. D’éirigh sé as in 2010 ach bíonn sé fós le cloisteáil ar An Saol Ó Dheas ar RTÉ Raidió na Gaeltachta gach Luan i rith an tsamhraidh agus na cluichí móra á bplé aige.

Dúirt Steve Ó Cúláin, Príomhfheidhmeannach Údarás na Gaeltachta gur “cúis áthais agus bróid” don eagraíocht a bheith ag déanamh urraíochta ar an ngradam, go háirithe agus é á bhronnadh “ar cheann de laochra móra na Gaeltachta agus na tíre, ár gcara dílis, Micheál Ó Muircheartaigh”.

“Tá ríméad orainn go bhfuil sé roghnaithe ag Coiste Náisiúnta Chomórtas Peile na Gaeltachta chun an t-aitheantas speisialta seo a fháil i bhfianaise an méid atá déanta aige chun an Ghaeilge, an Ghaeltacht agus na cluichí Gaelacha a chur chun cinn ar fud na tíre agus ar fud an domhain go deimhin.

“Tá lúcháir ar Údarás na Gaeltachta arís i mbliana urraíocht a dhéanamh ar Chomórtas Peile na Gaeltachta mar a rinneamar ó bhliain a bhunaithe siar sna seascaidí,” a deir Ó Cúláin.

Bunaíodh Gradam Lóchrann in 2013 agus bronntar é gach bliain é ar dhuine a bhfuil gaisce déanta acu maidir le cúrsaí spóirt a chur chun cinn sa Ghaeltacht. Coiste Náisiúnta Chomórtas Peile na Gaeltachta a roghnaíonn buaiteoir an ghradaim atá urraithe ag Údarás na Gaeltachta.

Is é an t-ealaíontóir Pádraic Reaney, as Conamara, a dhear agus a rinne an gradam.