Obair mhór le déanamh chun boic mhóra Uladh agus na Mumhan a shárú

Amárach, beidh Baile Gunnair ar ais i gCluiche Ceannais Club na Mumhan don naoú huair ó 2015. Tá ceithre bhua acu go dtí seo, agus craobh Éireann amháin. Caithfidh mé a rá, sílim gur beagán faoina gcumas an méid atá bainte amach acu go náisiúnta, go háirithe i bhfianaise cé chomh láidir is atá siad i bPort Láirge le breis agus deich mbliana, agus sa chúige freisin, áit ar éirigh go measartha maith leo.

Ach nuair a fhéachann tú ar thréimhsí ceannasaíochta chlubanna eile, go háirithe Seamróga Bhaile Héil, atá anois i mbarr an rolla onóra le naoi gcraobh uile-Éireann ó bhuaigh siad an chéad cheann acu i 1981, feictear gur bhain siad leas i gcónaí as na blianta maithe nuair a bhuaigh siad craobhacha an chontae agus an chúige.

Bhain Biorra as Uíbh Fhailí ceithre chraobh náisiúnta nuair a bhíodar i mbarr a maitheasa, agus an rud céanna ag Port Omna. Bhain Baile Átha an Rí trí cinn amach nuair a bhí siad i réim i nGaillimh, agus mar an gcéanna An Charraig Dhubh ó Chorcaigh agus Na Stiofánaigh ó Chill Chainnigh. Tá liosta maith ann de chlubanna eile a bhfuil dhá Craobh Éireann bainte acu, ina measc tá an sárchlub sin Seamróga Loch gCaol as Aontroim.

Mar sin, cé go n-admhaím agus go n-aithním gur foireann thar a bheith maith iad Baile Gunnair, is oth liom fós nár bhain siad níos mó ná craobh náisiúnta club amháin amach. Agus fiú an cluiche sin, ba le beagán den ádh a tháinig sé, leis an gcúl cáiliúil agus thar a bheith déanach sin ó Harry Ruddle

Amárach, rachaidh siad in adharca le hÉire Óg na hInse, nach raibh sa chluiche ceannais ó 1990. Ar an ócáid sin, chríochnaigh siad sa dara háit. Caithfidh tú a rá go mba cheart go mbeadh buntáiste ollmhór ag Baile Gunnair agus an oiread sin taithí acu ar laethanta móra i rith na mblianta. Is dócha gur féidir a rá freisin go bhfuil Éire Óg faoi mhíbhuntáiste freisin agus peileadóirí an chumainn ag imirt go dtí an Domhnach seo caite agus roinnt mhaith imreoirí ag iarraidh an dá thrá a fhreastal.

Sa dá chluiche leathcheannais, thug na buaiteoirí taispeántais láidre iománaíochta.

I bPáirc an Bhreathnaigh, thosaigh  Baile Gunnair go láidir i gcoinne na Sáirséalach agus bhí sé soiléir ag tús an chluiche go rabhadar in ardform. Ghlac siad an lámh in uachtar go luath, dhá chúl ó Dessie Hutchinson ag cur brú trom ar na Corcaígh ó thús báire. Cé gur throid na Sáirséalaigh go cróga, bhí cruinneas Pauric Mahony agus ceannasaíocht leaids na nDéise ar fud na páirce rómhaith dos na Sáirséalaigh. Le dhá chúl eile sa dara leath, bhí an bua lántuillte agus an lá leo.

I nDroichead Abhann ó gCearnaigh, troideadh cath crua go dtí gur séideadh an fheadóg dheiridh ach fuair Éire Óg an ceann is fearr ar Luachma-Caisleán Laighnigh ar scór 2-20 go 1-16 tar éis am breise.

Bhí John McGrath i mbarr a mhaitheasa do leaids Thiobraid Árann agus 0-12 aimsithe aige ach níor ghéill Éire Óg riamh. Chuir Danny Russell saorphoc ríthábhachtach thar an trasnán chun an cluiche a thabhairt go ham breise agus ba é an cúl cinniúnach a scóráil Darren Moroney sa 77ú nóiméad scór an lae.

Is deacair a rá nach mbuafaidh leaids na nDéise amárach. Is dócha go bhfuil na buntáistí cinniúnacha acu.

Ó thuaidh, beidh aicsean anocht agus cluiche ceannais Chraobh Shinsir Iomána Uladh ar siúl idir Sleacht Néill Dhoire agus Cumann Naomh Eoin ó Bhéal Feirste.

Tá an cluiche ceannais seo cothrom go leor déarfainn. Tá an-taithí ag Sleacht Néill ach léirigh Naomh Eoin a gcumas leis an 3-20 a scóráil siad sa chluiche leathcheannais. Cluiche a bheidh againn mar sin idir cuid de phiardaí móra na hiomána in Ulaidh agus dream atá ag iarraidh deireadh a chur leis an seanréimeas.

Tá a fhios ag Sleacht Néill gur scaoil siad Craobh na hÉireann uathu i mblianta eile agus tá Naomh Eoin lán díocais is fuadair anois tar éis deireadh a chur le fanacht 52 bliain ar chraobh Aontroma.

D’fhéadfadh an cluiche seo a bheith cothrom, dian agus ar ardchaighdeán. Ach is deacair féachaint thar na seanfhondúirí ó Dhoire.