Tabharfaidh Martin na cosa leis do Chomhaontas Glas i gCill Dara Thuaidh

Dáilcheantar: Cill Dara Thuaidh

Líon na suíochán: 4

Cuóta mar % den vóta: 20%

Leagan amach an dáilcheantair: Tuaisceart an chontae, na bailte Cill Droichid, Maigh Nuad, Léim an Bhradáin agus Nás na Rí agus ag síneadh siar go teorainn Uíbh Fhailí.

Teachtaí Dála sa 32ú Dáil atá ag seasamh: Catherine Murphy (SD), Bernard Durkan (FG), James Lawless (FF), agus Frank O’Rourke (FF). 

Staid na bpáirtithe in Olltoghchán 2016 agus i dtoghcháin áitiúla 2019.

Anailís: Rinne Fianna Fáil go maith dhá shuíochán a fháil anseo in 2016 le 28% den vóta. Bhí na vótaí roinnte réasúnta cothrom idir an bheirt iarrthóirí de chuid Fhianna Fáil agus toghadh an bheirt acu, James Lawless agus Frank O’Rourke, gan an cuóta a shroicheadh. Tá siad beirt ag seasamh arís. Toghfar duine acu ach is beag seans go dtoghfar an bheirt. Sna toghcháin áitiúla bhí Fine Gael beagáinín chun cinn ar Fhianna Fáil agus tabharfaidh sé sin dóchas d’Anthony Lawlor (FG) go mbeidh sé in ann an suíochán a chaill sé in 2016 a fháil ar ais. Má éiríonn leis is é Lawless (FF), arb as Nás na Rí é chomh maith, a bheadh i gcontúirt.

Bhíodh vóta láidir ag Páirtí an Lucht Oibre sa dáilcheantar seo agus eagraíocht dá réir acu le vótaí a bhailiú d’Emmet Stagg (LO).  B’in mar a bhíodh ach tá an taoille tráite ar Stagg i gCill Dara agus is í Catherine Murphy (SD) ó na Daonlathaigh Shóisialta is mó a fhaigheann vóta na heite clé. Toghadh í ar an gcéad chomhaireamh in 2016 agus 1,300 vóta le spáráil aici. Is aici atá an suíochán is sábháilte.

Ní raibh ach 4% den vóta ag Sinn Féin sna toghcháin áitiúla agus ar an gcaoi sin is beag seans atá ag an iarrthóir atá acu, Réada Cronin (SF) a chaill a suíochán ar an gComhairle Contae. Fós féin d’fhéadfadh idir 3,000-4,000 vóta a bheith aici le haistriú. San olltoghchán in 2016 chuaigh na vótaí aistrithe ó Shinn Féin i dtreo Fhianna Fáil seachas Fine Gael, cóimheas 3:1 beagnach.

Is seanfhondúir de chuid Fhine Gael é Bernard Durkan (FG), arb as Maigh Eo ó thús dó ach a bhfuil cónaí air i Maigh Nuad.  Ceithre bliana ó shin fuair sé beagnach 2,000 vóta aistrithe ó Emmet Stagg (LO), arb as Maigh Eo dhó chomh maith, agus seans go mbeidh an vóta aistrithe mór céanna le fáil aige an babhta seo. An t-aon cheo ina aghaidh ná a aois. Ag 74 bhliain d’aois, an mbeidh fonn ar dhaoine i bhFine Gael a vótaí céadrogha a thabhairt don Seanadóir Anthony Lawlor?

Tá tacaíocht láidir ag Anthony Lawlor (FG) thart ar Nás na Rí. Bhí  bearna de 1,000 vóta idir é féin agus James Lawless (FF) in 2016 agus bheadh air a bheith chun tosaigh ar Lawless (FF) le go mbeadh seans aige.

Ag seasamh do Chomhaontas Glas tá Vincent Martin (CG) agus is iarrthóir láidir é. Toghadh é ar an gComhairle Contae agus é ar bharr an chomhairimh i Nás na Rí le 1,462 vóta. Is deartháir é le Catherine Martin (CG), leascheannaire an pháirtí a toghadh ina Teachta Dála in 2016. Sa dáilcheantar seo, toghadh triúr ó Chomhaontas Glas ar an gComhairle Contae mí Bealtaine seo caite. Bhí beagnach 4,000 vóta ag iarrthóirí Chomhaontas Glas sna toghcháin áitiúla sin. Dá n-éireodh le Martin (CG) 1,000 vóta eile a chur leis an gcarn sin, bheadh sé san iomaíocht don suíochán deireanach leis an Seanadóir Anthony Lawlor (FG) agus an Teachta Dála James Lawless (FF).  Mar go mbeidh sé ag fáil vótaí aistrithe ó chuile thaobh, is mó seans ná a mhalairt gurb eisean a gheobhaidh an suíochán. 

Ag seasamh chomh maith tá Paul Mahon atá ag seasamh do Phobal Roimh Bhrabús agus tá Séamus Ó Riain ag seasamh do Renua. Ag rith chomh maith tá Wayne Swords (NS) agus David Monaghan (NS).

Tuar: Murphy (DS), Durkan (FG), Martin (CG) agus Lawless (FF)