Ranganna Gaeilge á ndéanamh ag Gareth Sheridan ‘ó d’fhill sé ar Éirinn’

Tá sé tugtha le fios ag beirt eile a bhfuil spéis léirithe acu san uachtaránacht go bhfuil siad ag foghlaim na Gaeilge.

Dúirt an fear gnó Gareth Sheridan gur thosaigh sé ag foghlaim na Gaeilge arís nuair a d’fhill sé ar Éirinn i mbliana agus thug Nick Delehanty, a sheol a fheachtas féin an tseachtain seo, go bhfuil “Gaeilge na hArdteiste” aige ach go bhfuil sé féin ag freastal ar ranganna faoi láthair freisin.

Dúirt urlabhraí de chuid Sheridan le Tuairisc go raibh an fear a bheadh ar an uachtarán is óige ar an tír dá dtoghfaí é ag freastal ar ranganna de chuid Cliste Grinds Academy leis an múinteoir Macdara Ó Béarra as an Spidéal i nGaeltacht na Gaillimhe.

Tá na ceachtanna á ndéanamh ag Sheridan ó bhí mí Aibreáin ann agus thart ar cheithre mhí déanta anois aige. Níl sé réidh go fóilleach le hagallamh a dhéanamh trí Ghaeilge, a duírt a urlabhraí, ach tá súil aige ceann a dhéanamh sna seachtainí amach romhainn.

“Tá sé ag déanamh a dhíchill an Ghaeilge a úsáid ar na meáin shóisialta an oiread agus is féidir leis freisin,” a dúirt an t-urlabhraí.

Dúradh freisin go mbraitheann Sheridan go bhfuil an Ghaeilge an-tábhachtach don uachtaránacht agus go gcoinneodh sé air ag cur feabhas ar a scileanna teanga dá dtoghfaí i dtoghchán na bliana seo é.

Fear eile a bhfuil spéis aige san uachtaránacht é Nick Delahanty, fear gnó, a sheol a fheachtas i mBaile Átha Cliath an tseachtain seo. Nuair a fiafraíodh de faoina chumas sa Ghaeilge dúirt Delahanty go bhfuil “Gaeilge na hArdteiste” aige ach go bhfuil sé i mbun ranganna faoi láthair freisin. Níor luaigh sé cén áit a bhfuil sé ag déanamh staidéar ar an teanga.

Dúirt Delahanty, a sheas mar neamhspleách san olltoghchán anuraidh, nach gceapann sé gur ghá go mbeadh an Ghaeilge ag Uachtarán na hÉireann an lá a sheasfadh sé in Áras an Uachtaráin ach gur cheart dó iarracht a dhéanamh í a fhoghlaim le linn an théarma.

Gheall Delahanty, a bhíonn ag labhairt amach in aghaidh an chaiteachais a dhéantar ar lóistín d’iarrthóirí tearmainn, go gcruthódh sé sraith físeán ar na meáin shóisialta ina gcuirfeadh sé síos ar a chuid iarrachtaí an Ghaeilge a fhoghlaim.

Mar a tuairiscíodh ar an suíomh seo an tseachtain seo, rinne duine de na daoine atá ag lorg ainmniúchán Fhine Gael don toghchán, Heather Humphreys, cúrsa teanga i nGleann Fhinne le hOideas Gael tamall de bhlianta ó shin. Tá Gaeilge líofa ag an duine eile ó Fhine Gael atá san iomaíocht don ainmniúchán – an Feisire Eorpach Seán Kelly.

Is cainteoir líofa Gaeilge í Catherine Connolly, atá ag seasamh ar son ‘Chomhghuaillíocht na hEite Clé’, an t-aon duine a bhfuil ainmniúchán oifigiúil faighte aici go dtí seo.

Níl duine ar bith curtha chun cinn ag Fianna Fáil go fóill.

Cainteoirí Gaeilge iad beirt de na daoine ón bpáirtí sin a bhfuil spéis léirithe acu i dtoghchán uachtaránachta an fhómhair, Éamon Ó Cuív agus Mary Hanafin.

Tá roinnt Gaeilge ag an mbeirt is déanaí atá á lua le Fianna Fáil agus an toghchán, Jim Gavin, iarbhainisteoir fhoireann peile Bhaile Átha Cliath, agus an feisire Eorpach Billy Kelleher.

Tá roinnt Gaeilge freisin ag ceannaire Shinn Féin Mary Lou McDonald, nach bhfuil cinneadh déanta go fóill aici faoina hainm féin a chur chun cinn.