Gaeil le tabhairt faoi mhír den ‘RuPaul’s Drag Race’ d’fhéile Bród 2021

Mír ón gclár aitheanta RuPaul’s Drag Race é an ‘Cluiche Snatch’, ina ngléasann rannpháirtithe mar charachtair cháiliúla

Gaeil le tabhairt faoi mhír den ‘RuPaul’s Drag Race’ d’fhéile Bród 2021

Reáchtálfar imeacht speisialta an deireadh seachtaine seo mar chuid d’fhéile Bród 2021 agus an chéad ‘Chluiche Snatch’ riamh i nGaeilge le craoladh ar Youtube.

Mír ón gclár aitheanta RuPaul’s Drag Race é ‘Cluiche Snatch’, ina ngléasann rannpháirtithe mar charachtair cháiliúla agus ina mbíonn ceisteanna éadroma seafóideacha líon-an-bhearna le freagairt.

Tá an cluiche á reáchtáil ag an gcomharghrúpa ealaíne AerachAiteachGaelach agus an grúpa sóisialta An Queercal Comhrá.

Ag glacadh páirt sa chluiche, tá Dean Farrell, teagascóir agus gníomhaí pobail; an scríbhneoir agus fuirseoir Eoin P. Ó Murchú; Jade Pepper, mainicín agus ealaíontóir; an Bhanríon Draig Kitty Ní Houlihán, agus an t-amhránaí Rút Ní Theimhneáin.

Beidh réimse leathan carachtar á léiriú acu cúigear, idir phearsana aitheanta liteartha agus réaltaí cáiliúla náisiúnta agus idirnáisiúnta.

Is iad Hugh Carr, Hilary Bowen-Walsh, agus Kevin Johnston a bheidh ina moltóirí ar an gcluiche agus duais €300, urraithe ag Foras na Gaeilge agus Oireachtas na Gaeilge, don bhuaiteoir.

Craolfar an Cluiche Snatch ag 13:00 amárach, Dé Sathairn, an 26 Meitheamh mar chuid de Bhród 2021 ar chuntas YouTube AerachAiteachGaelach.

Fág freagra ar 'Gaeil le tabhairt faoi mhír den ‘RuPaul’s Drag Race’ d’fhéile Bród 2021'