Éachtaint bhreá ag TG4 ar shaol is ar shaothar ghaiscígh an chúraim

Cuireann an tsraith Cúramóirí (TG4, Dé Máirt) roimhe éachtaint a thabhairt ar shaol is ar shaothar oibrithe deonacha, cúramóirí agus eagraíochtaí gairmiúla atá dírithe ar chúram a dhéanamh do dhaoine a bhfuil riachtanais ar leith acu.

Dream iad seo atá ag saothrú go ciúin agus a bhfuil a ngaisce, a gcineáltas, a dtuiscint, a bhfoighne agus a ndúthacht ag dul i ngan fhios nach mór. Níl sin ag dul i ngan fhios do na daoine a bhfuil siad ag tindeáil orthu; dream atá imeallaithe ag an tsochaí agus ar an bhfaraor géar. Léiríonn an chéad ghála den tsraith seo é sin go paiteanta.

I dtosach an chláir buailimid le Diarmuid Mac Dubhghlais ó Bhaile Átha Cliath a chuir an charthanacht Éire Nua Food Initiatives ar bun i rith na paindéime. Cuireann sé, i gcomhar le Grubs Up Homeless, bia ar fáil do dhaoine atá i ngátar mar aon le héadaí agus nithe eile a sholáthar dóibh. É ag trácht go tuisceanach gur mór ag daoine gan dídean na brístí spóirt ó thaobh an teasa agus na ciarsúir nó na ceirtíní linbh ó thaobh an ghlantachais.

An tseiftiúlacht le feiscint nuair a tarrtháladh tuairim is 70 puball ó scrios Electric Picnic. A dhaonnacht le brath is é ag caint faoi na daoine truacánta seo: “Ní figiúirí ar bhord éigin iad, is daoine iad.”

Is altra cúraim mhaolaithigh í Úna O’Kane in Ospís na Gaillimhe. Is cinnte go gcaithfidh tréithe faoi leith a bheith agat le bheith ag obair san earnáil dhúshlánach, mhothúchánach, thairbheach seo. Ach oiread le Diarmuid mothaíonn sí an dualgas agus an tábhacht a bhaineann leis an lámh chúnta a thabhairt dóibh siúd atá i ngátar.

Bhí Pádraig Ó hAiniféin, ó Chorca Dhuibhne ó dhúchas, sé bliana déag d’aois nuair a tharla timpiste thubaisteach shimplí dó. Fágadh gan lúth na ngéag é. Chaith sé deich mí ag teacht chuige féin i nDún Laoghaire ach tá sé i gcathaoir rothaí ó shin. Tugann sé siúd insint ar scéal an té atá faoi chúram.

Tá sé in ann maireachtaint go neamhspleách i gCorcaigh a bhuíochas do lucht cúraim a thagann chuige go rialta. Ach oiread leis na rannpháirtithe eile labhair sé go fealsúnach, tomhaiste. Bhíos an-thógtha leis an dearcadh a bhí aige agus é ag trácht ar an tslí gur féidir le daoine le mhíchumas iontas a chur orainn agus gur fhág a thimpiste go raibh meon níos oscailte aige i leith an tsaoil.

Níl aon mór is fiú nó buaileam sciath le sonrú i gcaint na rannpháirtithe. A mhalairt ar fad, iad umhal agus á dtiomáint ag an tuiscint gur dual don duine daonna lámh chúnta a thabhairt don té atá i ngalar na gcás. Tugann sin cumhacht chiúin agus buillí mothúchánacha don saothar. Sí an tráchtaire cumasach Norita Ní Chartúir is fearr a dúirt é. Tá na cúramóirí “mar chuisle agus mar chnámh droma ár sochaí”. Sách ráite ag clár breá.