‘Deis eile’ chun cearta phobal na Gaeilge a chinntiú ‘ligthe le sruth’ i Stormont

Tá cáineadh géar déanta ag Conradh na Gaeilge agus ag Sinn Féin ar pháirtithe an Fheidhmeannais a thug droim láimhe inné le hAcht Gaeilge don Tuaisceart.

Vótáil na páirtithe aontachtaithe agus an Alliance i gcoinne Acht Teanga inné, rud a chuir “díomá an domhain” ar an Aire Cultúir Carál Ní Chuilín.

Tá díoma an domhain orm gur caitheadh mo mholtaí do Bille Gaeilge amach inniu. Executive threw out proposals for Irish Language Act today

— Carál Ní Chuilín MLA (@CaralNiChuilin) 10 Márta 2016

Dúirt Conradh na Gaeilge aréir gur “deis iontach” a bhí ann don fheidhmeannas “tacú le mianta an phobail trí ghlacadh le moltaí an Achta agus na Straitéise Gaeilge a cuireadh faoina bhráid inné.

“Ar an drochuair, cailleadh an deis seo agus cailleadh deis eile cearta phobal na Gaeilge a chinntiú trí Acht bunaithe ar chearta a chur i bhfeidhm.

“Léiríodh arís go bhfuil tacaíocht leathan ann do reachtaíocht chosanta don Ghaeilge anseo agus ghlac breis is 13,000 páirt sa phróiseas comhairliúchán ar Bhille na Gaeilge. Bhí beagnach 95% díobh siúd ar son an Achta,” a dúirt Bainisteoir Abhcóideachta Chonradh na Gaeilge, Ciarán Mac Giolla Bhéin.

Dúirt sé chomh maith go raibh an fhorbairt straitéise don Ghaeilge ina dlúthchuid de Chlár Rialtais 2011-2015 an Fheidhmeannais.

“Tá sé do-ghlactha nach féidir leis an fheidhmeannas a gclár rialtais féin a chur i gcrích,” a dúirt Mac Giolla Bhéin.

Dúirt Uachtarán Chonradh na Gaeilge, Cóilín Ó Cearbhaill go léiríonn suirbhéanna agus pobalbhreitheanna éagsúla “go bhfuil tacaíocht leathan ann don Ghaeilge ó thuaidh”.

Dúirt Ó Cearbhaill “gur trua nach n-aithnítear an dea-thoil seo ag leibhéal an fheidhmeannais” agus gur údar “náire” é “gurb é pobal na Gaeilge ó thuaidh” an t-aon dream “sna h-oileáin seo nach bhfuil reachtaíocht chosanta acu don teanga”.

“Is ceist cearta í seo agus tá dualgas ar gach polaiteoir agus páirtí cearta lucht labhartha na Gaeilge a dhaingniú i reachtaíocht agus na huirlisí a thabhairt don phobal, a ghlac páirt i gcomhairliúcháin an rialtais go fonnmhar agus le díograis, forbairt na Gaeilge a thiomáint sna blianta amach romhainn. Is trí reachtaíocht ceartbhunaithe a dhéanfar seo,” a dúirt Uachtarán Chonradh na Gaeilge, Cóilín Ó Cearbhaill.