Cainteoir dúchais Gaeilge cloiste den uair dheireanach ar Duolingo

D’fhéadfadh go bhfuil cainteoir dúchais Gaeilge cloiste den uair dheireanach ag foghlaimeoirí Duolingo.

Tá an Ghaeilge i measc na dteangacha eile ar an aip foghlama teanga Duolingo atá á gcur i láthair ag AI seachas ag cainteoirí dúchais, mar a bhíodh cheana.

Cainteoir dúchais aitheanta as Conamara a chloiseadh foghlaimeoirí Gaeilge Duolingo roimhe seo agus tá a míshástacht curtha in iúl ag roinnt daoine faoi na glórtha Gaeilge nua AI atá le cloisteáil ar an aip.

Deir Duolingo go bhfuil a gcuid saineolaithe teanga ag dul i muinín na hintleachta saorga le cúrsaí a fhorbairt agus go bhfuil ag éirí leo “tuilleadh ceachtanna a chur ar fáil níos gaiste na riamh”.

Baineann Duolingo úsáid as AI darb ainm Múnla Mór Teanga lena gceachtanna a fhorbairt.

Maítear ar bhlag Duolingo go bhfuil an Teanga Shamhaltaithe Mhór “an-mhaith” ag ‘samhlú’ focal ar dóigh leis gur chóir iad a bheith le chéile, mar a bheadh abairt ann.

“Is é an cur chuige céanna é is a bhíonn le feiceáil ar d’fhón nuair a thugtar roghanna do dhaoine faoin chéad fhocal eile a d’fhéadfadh a bheith i dteachtaireacht.

“Agus an Múnla Mór Teanga cumhachtach i lámha ár gcuid saineolaithe, is féidir linn an iliomad ábhar a chruthú dár gceachtanna ach cnaipe a bhrú,” a deirtear.

Deir daoine áirithe ar líne nach féidir brath ar fhoghraíocht na nglórtha AI agus go mbíonn fadhbanna eile gramadaí i gceist leo freisin.

Seoladh an chéad chúrsa Gaeilge ar Duolingo i mí Lúnasa na bliana 2014. I léirmheas a rinneadh ar Tuairisc in 2014 ar an chúrsa Gaeilge dúradh gur “laige an cúrsa Gaeilge” mar nach raibh cainteoirí dúchais nó cainteoirí a raibh ardchaighdeán Gaeilge le cloisteáil i mbun teagaisc.

Bhí cainteoirí dúchais Gaeilge le cloisteáil ar an aip ina dhiaidh sin.

Bhí an Ghaeilge tamall ar an teanga ba mhó a raibh dlús fúithi ar Duolingo ó thaobh líon na ndaoine a bhí ag íoslódáil cúrsaí.

Bhíodh na cúrsaí Gaeilge ar na cinn is mó a bhíodh á n-íoslódáil ag muintir na hÉireann ach de réir na tuarascála is déanaí ó Duolingo bhí an Ghaeilge sa dara háit in Éirinn, taobh thiar den Spáinnis, in 2022.

In 2021 bhí an Ghaeilge ar an 16ú teanga is mó tóir ar an aip ar fud an domhain.

Sna Stáit Aontaithe atá formhór na bhfoghlaimeoirí Gaeilge lonnaithe, ach tá muintir na hÉireann, na Breataine, agus Cheanada i measc na ndreamanna is mó atá cláraithe leis an chúrsa teanga.