Beoshruthú le déanamh ar chluichí Chorca Dhuibhne tráthnóna

Cé nach mbeidh cead isteach ag na cluichí tráthnóna, beidh deis ag lucht peile Chorca Dhuibhne féachaint ar dhá chluiche mhóra i gCraobh Shinsir Chiarraí.

Tá comhfhoireann Chiarraí Thiar agus peileadóirí an Daingin ag dul chun páirce tráthnóna i gcéad bhabhta na craoibhe agus tá beoshruthú á dhéanamh ar an dá chluiche.

Is ag 3.00i.n. i bPáirc Aibhistín de Staic a bheidh Ciarraí Thiar ag tabhairt aghaidh ar Bhord Naomh Bréanainn agus tá CLG Chiarraí ag déanamh craoladh ar an gcluiche. Costas €5 a bheidh orthu siúd ar mhaith leo an cluiche a fheiceáil.

Beidh cuid mhaith de na himreoirí a bheidh ag imirt tráthnóna ag tabhairt aghaidh ar a chéile arís nuair a thabharfaidh Cumann Caide na Gaeltachta agus na Gaeil aghaidh ar a chéile i gcluiche ceathrú ceannais Chraobh Idirmheánach Chiarraí ach beidh siad ag iarraidh coimhlint an lae inniu a bhuachan ar dtús.

Chomh maith le fir na Gaeltachta, beidh na himreoirí is fearr ó Abhainn an Scáil agus Caisleán Ghriaire ar fhoireann Chiarraí Thiar ach tá cluiche crua rompu in aghaidh Bhord Naomh Bréanainn, a chuaigh chomh fada le babhtaí leathcheannais na craoibhe anuraidh agus beirt d’imreoirí Chiarraí, Jack Barry agus Diarmuid O’Connor, i láir páirce acu.

Níos deireanaí tráthnóna, beidh Daingean Uí Chúis ag imirt i gcoinne an Teampaill Nua i bPáirc an Ághasaigh ag 6.00i.n. Beidh an cluiche sin le feiceáil saor in aisce ar shuíomh an Irish Examiner.

D’éirigh go maith le fir an Daingin i gcraobh na gclubanna. As na trí chluiche a imríodh, d’éirigh leo péire a bhuachan agus chríochnaigh an ceann eile ar comhscór. Tá leithéidí Tom O’Sullivan, Barry O’Sullivan agus muintir Geaney ag déanamh go maith dóibh agus súil acu na babhtaí ceannais a bhaint amach arís i mbliana.

Níor éirigh chomh maith céanna leis an Teampall Nua sna cluichí a bhí acu féin le mí anuas. Bhuaigh siad Craobh Idirmheánach Chiarraí anuraidh agus chuaigh siad ar aghaidh gur thug leo Craobh na Mumhan chomh maith ach níl cluiche buaite acu i ngrád na sinsear fós agus tá trí chluiche as a chéile caillte acu.

Cuirfidh filleadh Thadhg Morley borradh fúthu agus beidh siad ag brath air féin, ar mhuintir Spillane agus Crowley más fúthu an lá a thabhairt leo sa Daingean.