Tá ardú ar na liúntas a íochta le lucht lóistín na gcoláistí Gaeilge fógartha ag Aire na Gaeltachta.
Tá €14.50 in aghaidh an dalta in aghaidh na hoíche, ardú €1.50, anois le híoc le mná agus fir tí na Gaeltachta as lóistín a chur ar fáil faoi Scéim na bhFoghlaimeoirí Gaeilge. Is ionann sin agus ardú 12%.
Is é seo an ceathrú huair don rialtas an liúntas a mhéadú le blianta beaga anuas. €10 in aghaidh na hoíche a bhí sa liúntas in 2022.
Rinne an tAire an fógra le linn cuairte ar Choláiste Mhuigheo, áit ar bhuail sé le mná tí, múinteoirí, daltaí agus baill foirne eile.
D’fhógair an tAire Calleary chomh maith go bhfuil ardú €1 ó €9.50 go €10.50 ar an deontas a íoctar leis na brúnna agus coláistí cónaithe a chuireann lóistín ar fail faoin scéim.
Cuirfear na rátaí nua i bhfeidhm ón 31 Bealtaine 2025, tús na gcúrsaí samhraidh i mbliana. Deir Roinn na Gaeltachta go mbainfidh os cionn 500 teaghlach sa nGaeltacht leas as an ardú nua.
Anuraidh a fógraíodh an t-ardú is déanaí roimhe seo ar an scéim agus an íocaíocht ag dul suas ó €12 go dtí €13.
Anuas ar na hardaithe seo, tá ardú ar an bhfóirdheontas a íoctar faoi dhá scéim eile de chuid na Roinne, Scéim Oileánda (ÁRAINN) Gaeltachta faoina dtugtar deis do scoláirí scoilbhliain iomlán a chaitheamh ar cheann de na trí oileán Árainn agus an Scéim ERASMUS Gaeltachta faoina dtugtar deis do mhic léinn tríú leibhéil seimeastar a chaitheamh sa Ghaeltacht.
Dúirt an tAire Calleary go raibh tábhacht faoi leith ag Scéim na bhFoghlaimeoirí Gaeilge don teanga agus do gheilleagar na Gaeltachta.
“Is iad na teaghlaigh a chuireann lóistín ar fáil atá mar chnámh droma na scéime. Mar aitheantas air sin agus ar an ardú atá tagtha ar na costais a thiteann orthu, tá áthas orm an méadú deontais seo a fhógairt a chabhróidh le hós cionn 500 teaghlach,” ar sé.
“Lena chois sin, cabhróidh an t-ardú leis na coláistí cónaithe agus go deimhin na coláistí ar fad lena gcuid iarrachtaí féin chun teaghlaigh nua a earcú agus a choinneáil.”
| Fóirdheontas | Ráta 2024 | Ráta 2025 |
| Gnáthchúrsaí | €13.00 | €14.50 |
| Brú/coláiste cónaithe | €9.50 | €10.50 |
| ERASMUS Gaeltachta | €22.00 | €23.50 |
| Scéim Oileánda (ÁRAINN) Gaeltachta | €34.00 | €35.50 |
Áine
Bhfuiltear ag rá nach bhfaigheann mná tí /fir tí ACH €14.50 in aghaidh an dalta in aghaidh na hoíche??? Sin €100 an dalta in aghaidh na seachtaine le haghaidh leaba, bricfeásta, dinnéar… Agus lón?? Más amhlaidh, ní mórán é sin, im thuairimse.