An Taoiseach ag iarraidh go dtabharfaí ainm Gaeilge ar ospidéal nua na leanaí

Ba mhaith leis an Taoiseach Leo Varadkar go mbeadh ainm Gaeilge ar ospideál nua na leanaí.

“Pé ainm a roghnófar ba cheart go mbeadh sé oiriúnach do leanaí agus, dá bhféadfaí ar chor ar bith, é a bheith as Gaeilge. Ní cóir go mbainfeadh sé leis an bpolaitíocht ná le haon pholaiteoir ná ní cóir go mbeadh teachtaireacht pholaitiúil ar bith ag baint leis,” a dúirt Leo Varadkar sa Dáil inniu.

Dúirt an Taoiseach go mbeadh sé oiriúnach ainm Gaeilge a thabhairt ar an ospidéal náisiúnta nua agus Bliain na Gaeilge 2018 romhainn amach.

Dúirt sé gur gá ainm simplí a thabhairt ar an ospidéal nua, agus gur mhaith leis féin gur ainm Gaeilge a bheadh ann.

“…Más fúinn ainm sainiúil a roghnú, ba mhaith liom gur as Gaeilge a bheadh sé. Deis atá ann le linn Bhliain na Gaeilge ainm Gaeilge a roghnú don ospidéal. Ní ainm duine agus é aistrithe go Gaeilge atá i gceist agam ach focal Gaeilge.

“Is é an t-ainm is ansa liomsa ná ‘Starship’, an t-ainm atá ar ospidéal na leanaí sa Nua-Shéalainn. Níorbh iad na polaiteoirí a thug an t-ainm sin air, b’amhlaidh gur tharla sé trí thimpiste mar go bhfuil cuma ‘starship’ air agus b’in a thosaigh na leanaí féin a thabhairt air. Glacadh leis mar ainm oifigiúil ina dhiaidh sin,” a dúirt an Taoiseach.

Bhí sé i gceist an ‘Phoenix Children’s Hospital’ a thabhairt ar ospidéal nua na leanaí, ach dheimhnigh an Taoiseach go bhfuil an plean sin caite i dtraipisí.

Mhol ceannaire Shinn Féin Gerry Adams go n-ainmneofaí an t-ospidéal i ndiaidh Kathleen Lynn, an réabhlóidí agus dochtúir a bhí ar dhuine de bhunaitheoirí Ospidéal Naomh Ultan. Dúirt ceannaire Pháirtí an Lucht Oibre Brendan Howlin gur cheart comórtas náisiúnta a eagrú i measc leanaí scoile chun teacht ar ainm nua.