Toghcháin19 – cé a bheas ag ceiliúradh i gConamara Theas?

Sa tsraith seo caitear súil chun cinn ar thoghcháin áitiúla na seachtaine seo sna ceantair Ghaeltachta. Conamara Theas atá faoi chaibidil inniu againn…

Toghcháin19 – cé a bheas ag ceiliúradh i gConamara Theas?

Toghcheantar: Conamara Theas

Líon na suíochán: 5

An 11 iarrthóir: Criostóir Breathnach, Ros Muc (Nspl); Daithí Ó Cualáin, Indreabhán (FF); An Comhairleoir Tomás Ó Curraoin (RSF), Bearna; Patrick Feeney (Nspl), Riverside, Gaillimh; Ann Flaherty (FG), Ceantar na nOileán; MacDara Hosty (FF), Bearna; Máirtín Lee (FF), Ceantar na nOileán; Pádraig Joe Joe Mac An Iomaire(FF), Na Doireadha; Alastair Mc Kinstry (Comhaontas Glas), Maigh Cuilinn; Kevin O Hara (SF), An Spidéal agus An Comhairleoir Noel Thomas (FF) ó Mhaigh Cuilinn.

Toghcheantar nua é seo, a cruthaíodh nuair a briseadh suas Conamara chun Conamara Theas, le cúig shuíochán, agus Conamara Thuaidh, le ceithre shuíochán, a dhéanamh de.

Tá taithí ag beirt de na hiarrthóirí, Tomás Ó Curraoin (RSF) agus Noel Thomas (FF) ar an gcomhairle contae. Tá an Comhairleoir Seán Ó Tuairisg (FF) ag éirí as. Ón teailí in 2014 bhí thart ar 800 vóta ag Cathaoirleach na comhairle idir Cois Fharraige, An Cheathrú Rua agus Oileáin Árann. Tá Ó Tuairisg ag tacú an uair seo le Dáithí Ó Cualáin, a sheas mar iarrthóir neamhspleách in 2014 nuair a fuair sé 440 vóta. Má éiríonn leis an gCualánach ar a laghad leath de na vótaí a bhí ag Seán Ó Tuairisg i gCois Fharraige a tharraingt chuige féin chomh maith le codán maith de na vótaí a bhíodh ag an gComhairleoir Seosamh Ó Cualáin sa gCeathrú Rua a fháil, ba chóir go mbeadh sé in ann suíochán a ghnóthú.

Beidh suíochán amháin ar a laghad ag Fine Gael. Tá aithne phearsanta ag daoine ar Phádraig Joe Joe Mac An Iomaire ar fud an cheantair agus dá bharr sin tá mé den bharúil gur aige a bheas sé. Tá dhá bhuntáiste ag Ann Flaherty a chabhróidh go mór léi. Is í an t-aon bhean atá san iomaíocht sa dtoghcheantar agus tá sí ag obair in oifig Aire Stáit na Gaeltachta Seán Kyne i Maigh Cuilinn agus teagmháil aice le go leor le daoine ar fud an toghcheantair.  Le fanacht sa rása go dtí an deireadh bheadh uirthi a bheith chun cinn ar Noel Thomas (FF) nó ar Mháirtín Lee (FF), agus aistriúchán maith a fháil uathu dá gcuirfí ceachtar acu as an gcomhaireamh. Ach ní fheicim sin ag tarlú, mar go mbeidh an ceathrú duine ag Fianna Fáil ag fanacht ar vótaí chomh maith.

Chaill Máirtín Lee (FF) suíochán in 2014 le 79 vóta. Dá mbeadh 80 vóta breise tugtha dó bheadh sé ina chomhairleoir anois in áit Noel Thomas (FF). Is cinnte go bhfuil sin á lua aige agus é ag canbhasáil i gCeantar na nOileán agus sa gCeathrú Rua. Tá sé suntasach go bhfuil fógra crochta aige ag Droichead Chasla leis an dteachtaireacht láidir gan an ceantar siar ó Abhann Chasla a fhágáil gan aon chomhairleoir. Ar an mbonn sin, ceapaim go bhfaighidh sé na vótaí breise atá uaidh le suíochán a thógáil.

Is iontach an bealach a n-éiríonn le Tomás Ó Curraoin (RSF) a shuíochán a choinneáil. Is branda polaitiúil é Sinn Féin Poblachtach nach mbeifeá ag súil go mbeadh tacaíocht mhór aige i measc na meánaicme ach is ag Tom Ger is mó a bhí vótaí i mboscaí Bhearna (280) in 2014. Beidh MacDara Hosty san iomaíocht leis do na vótaí sin an uair seo arís. Níor éirigh le fear Fhianna Fáil vótaí a mhealladh chuige féin taobh amuigh de Bhearna in 2014, agus ní raibh aige sa gcéad chomhaireamh ach 345 vóta. Theastódh uaidh an vóta sin a dhúbailt le seans ar bith a bheith aige.

Má fhanann an Curraoineach chun cinn ar Kevin O’Hara (SF) is féidir leis a bheith ag súil le haistriú maith ó fhear Shinn Féin. Le bheith sa rása ag an deireadh bheadh ar Kevin O’Hara 300 vóta ar a laghad a chur leis an 627 vóta céadrogha a fuair Máirín Mhic Lochlainn (SF) in 2014. Ní fheicim sin ag tarlú sa toghchán seo ach mar sin féin d’fhéadfadh sé a bheith san iomaíocht don chúigiú suíochán le Ann Flaherty (FG) nó le Noel Thomas (FF). Caithfear a chur san áireamh go mba í Ann Flaherty an tríú bean a roghnaigh Fine Gael le dul san iomaíocht ar an dticéad in éindí le Pádraig Joe Joe Mac an Iomaire, tar éis do bheirt eile tarraingt siar, an Comhairleoir Niamh Byrne ar dhuine acu. Ba cheart go bhfaigheadh Ann Flaherty (FG) cuid mhaith de vóta Fhine Gael a bhí ag an gComhairleoir Niamh Byrne (FG) thart ar Mhaigh Cuilinn cúig bliana ó shin agus má fhaigheann beidh sí san iomaíocht go dtí an deireadh.

Tá a dhóthain vótaí i gceantar Mhaigh Cuilinn le duine amháin ar a laghad a thoghadh. Fuair Séamas Walsh (FF) agus Tom Welby (Nspl) slám deas vótaí i gceantar Mhaigh Cuilinn in 2014. Níl ceachtar den bheirt acu san iomaíocht i gConamara Theas – roghnaigh an bheirt Conamara Thuaidh  – ba cheart go mbeadh a dhóthain vótaí ann don Chomhairleoir Noel Thomas (FF) lena chur thar an líne, más ar éigean é.

Ní fheicim go mbeidh mórán thar 200 vóta ag Alastair McKinstry (Comhaontas Glas) agus beidh Criostóir Breathnach (Nspl) agus Patrick Feeney (Nspl) ag déanamh go maith má fhaigheann ceachtar acu 100 vóta.

Tuar: Pádraig Mac An Iomaire (FG), Máirtín Lee (FF), Tomás Ó Curraoin (RSF), Daithí Ó Cualáin (FF) agus Noel Thomas (FF)

Fág freagra ar 'Toghcháin19 – cé a bheas ag ceiliúradh i gConamara Theas?'

  • An Spidéal Abu

    Mo thuairim i gConamara Theas

    1. Pádraig Joe Joe FG
    2. Máirtín Lee FF
    3. Noel O’Hara SF (gan Quota)
    4. Ann Flaherty FG (gan Quota)
    5. Noel Thomas FF

    Thomas tofa i dtosach. Lee agus PJoe le móramh beag an duine.

    O’Hara ag braith ar bheith imithe thairis O Curraoin agus Flaherty o mhóramh PJJ+LEE nuair a bheidh an comhaireamh deireannach thart. O Curraoin sa séu áit an babhta seo.