Tá Údarás na Gaeltachta “i mbun plé” lena gclianchomhlachtaí i láthair na huaire lena chinntiú go bhfuil “an saineolas agus an tacaíocht chuí” acu le dul i ngleic le himpleachtaí an mhargaidh a rinne Coimisiún na hEorpa le hUachtarán Mheiriceá Donald Trump an tseachtain seo.
Is fiú €658 milliún sa bhliain na heaspórtálacha ó chomhlachtaí a fhaigheann tacaíocht ón Údarás gach bliain agus is chuig margaí Stáit Aontaithe Mheiriceá agus Cheanada a théann 14% de sin.
Cuirfidh an margadh trádála seo ceangal ar an dá thaobh maidir le taraifí 15% ar fhormhór earraí an Aontais Eorpaigh chun na Stát Aontaithe. Bhí taraif 30% á bagairt ag uachtarán Mheiriceá roimh an gcruinniú a tharla in Albain Dé Máirt.
Dúirt urlabhraí an Údaráis go bhfuil “tábhacht” le margadh Stáit Aontaithe Mheiriceá do chomhlachtaí atá lonnaithe sa Ghaeltacht agus go bhfuil an eagraíocht ag tacú leo i láthair na huaire.
“Aithníonn Údarás na Gaeltachta an tábhacht a bhaineann le margaí idirnáisiúnta a dheimhniú do chliantchomhlachtaí an Údaráis, go háirithe i gcomhthéacs €658m de dhíolachán na gcomhlachtaí seo a bheith á n-easpórtáil ón nGaeltacht.
“Is chuig margadh Mheiriceá thuaidh a easpórtáiltear 14% den iomlán sin ó chomhlachtaí Gaeltachta agus tá ár gcuid feidhmeannach i mbun plé leis na comhlachtaí seo i láthair na huaire chun a chinntiú go bhfuil an saineolas agus tacaíocht chuí acu, mar a déanadh le linn na tréimhse ullmhaithe roimh theacht an Bhreatimeachta,” a dúradh i ráiteas a cuireadh ar fáil do Tuairisc.
Dúirt Danny McCoy, príomhfheidhmeannach Ibec, ar Morning Ireland Dé Luain gur “ghéill” an tAontas Eorpach do Trump agus nach margadh maith a bhí ann do thíortha na hEorpa.
San áireamh sa mhargadh tá na táirgí cógaisíochta a ndéantar go leor díobh in Éirinn. De réir na bhfigiúirí is déanaí atá ar fáil ó Údarás na Gaeltachta, is ceimiceáin agus táirgí leighis iad 19% de na hearraí a easpórtálann cliantchomhlachtaí de chuid Údarás na Gaeltachta.
Tá roinnt mhaith comhlachtaí móra cógaisíochta lonnaithe i gceantair Ghaeltachta – leithéidí Viatris, Sláinte Hi-Tech agus Freudenburg Medical i nGaeltacht na Gaillimhe agus Randox ar an gClochán Liath i nDún na nGall.
Níos luaithe i mbliana, thug Údarás na Gaeltachta le fios do Tuairisc gur ag díriú ar leas a bhaint as “caidrimh thrádála níos láidre” le Ceanada agus le tíortha an Aontais Eorpaigh a bheadh an eagraíocht i bhfianaise na dtaraifí a d’fhógair Trump.
Dúirt urlabhraí de chuid an Údaráis i mí Aibreáin go raibh an eagraíocht forbartha Gaeltachta ag iarraidh na cliantchomhlachtaí atá faoina coimirce “a éagsúlú” agus iad a chosaint ó thionchar na dtaraifí.
Dúradh go gcuirfidh Údarás na Gaeltachta “gach acmhainn ar fáil” le cabhrú le cliantchomhlachtaí na heagraíochta “an stoirm” atá tarraingthe ag Trump a sheasamh agus go gcoinneoidh oifigigh an Údaráis “súil ghéar” ar “éifeacht na dtaraifí”.
Fág freagra ar '‘Tacaíocht’ á cur ar fáil do chomhlachtaí Gaeltachta maidir le taraifí Trump'