Bonn uile-Éireann a chur i bpóca Patrick Horgan an rud is mó a chuirfeadh sonas ar mhuintir Chorcaí an deireadh seachtaine seo, dar le hiar-imreoir agus iarbhainisteoir an chontae, John Allen.
Tá Horgan ar an té is mó a d’aimsigh scóranna riamh i gCraobh Shinsir Iomána na hÉireann agus é ag imirt le Corcaigh le hocht mbliana déag ach tá fear Fhánaithe an Ghleanna fós gan bonn uile-Éireann agus gan Corn Mhic Cárthaigh buaite ag Corcaigh ó 2005.
Tá deis ag Corcaigh deireadh a chur leis an ngorta sin Dé Domhnaigh beag seo nuair a thabharfaidh siad aghaidh ar Thiobraid Árann i gcluiche ceannais na hÉireann agus muintir an chontae ag súil go ndéanfar an gaisce chun an bonn atá tuillte ag Horgan, dar leo, a thabhairt dó.
Agus é ag labhairt ar eagrán speisialta de phodchraoladh Tuairisc ‘An Pod Spórt’ roimh chluiche ceannais na hÉireann, dúirt Allen go rabhthas ag súil thar aon rud eile cois Laoi go bhfaigheadh Horgan a bhonn.
“Tá mé ag súil go mbeidh an lá ag Corcaigh agus go mbeidh Hoggie, ceann de na tosaithe is fearr a d’imir iománaíocht riamh, ag fáil bonn Chraobh na hÉireann ag an deireadh,” a dúirt Allen, a bhí ina bhainisteoir ar Chorcaigh an uair dheireanach gur bhuadar an chraobh.
“D’fhéach mé ar chuid de na hagallaimh a rinne imreoirí agus bainisteoirí ag na preas-ócáidí agus bhíodar ag rá go bhfuil seans ann nach mbeimid ar ais anseo go deo nó go mbeidh imreoirí áirithe nach mbeidh riamh ar ais ag imirt sa chluiche ceannais agus tarlaíonn sin,” a dúirt Allen agus é ag tagairt do Horgan, atá 37 bliain d’aois.
Is í foireann Chorcaí rogha láidir na coitiantachta do chluiche ceannais an Domhnaigh ach deir Allen nach mbeidh cluiche leath chomh héasca acu is a cheapann go leor daoine.
Dúirt Allen gur measadh go mbeadh Corcaigh róláidir do chontae an Chláir i gcluiche ceannais na bliana anuraidh ach gurb iad na Cláirínigh a thug an lá leo.
Thug foireann Pat Ryan Craobh na Mumhan leo níos luaithe i mbliana agus Luimneach sáraithe acu agus thugadar stánáil d’Áth Cliath i gcluiche leathcheannais na hÉireann, nuair a scóráladar seacht gcúl. Deir Allen nach bhfuil an fhoireann gan locht, áfach, agus an dara leath in aghaidh chontae an Chláir nuair a ghéilleadar farasbarr 12 pointe, agus an “léasadh” a thug Luimneach dóibh cúpla seachtain ina dhiaidh sin, á lua aige.
“Níl Corcaigh chomh maith is a cheapann daoine. Ceapaim go mbeidh an cluiche seo cothrom go leor,” a dúirt Allen, cé go raibh sé fós ag tuar go mbeadh an bua ag a chontae dúchais.
Bhí Paul Flanagan, a bhuaigh Craobh na hÉireann le hiománaithe an Chláir in 2013 agus in 2024 ar an bpodchraoladh chomh maith agus cé gur aontaigh sé go raibh buntáiste ag Corcaigh, dúirt sé go bhféadfadh go leor a bheith ag brath ar an aimsir.
“Rud éigin éagsúil atá i m’intinn, má bhíonn sé sleamhain, beidh Tiobraid Árann ag dul suas ar an mbus sin ag rá leo féin ‘Ok, is maith linn é seo’. Tá sé chomh simplí leis sin ach cruthaíonn sé coinníollacha páirce deacra do thosaithe Chorcaí. Tuigim go bhfuil sé ait mar rud ach sin an rud atá i m’intinn mar chosantóir agus mar iarimreoir.”
Tá cuid mhaith den chaint roimh an gcluiche ag díriú ar conas línte lántosaithe na bhfoirne a stopadh, dúshlán a bhfuil taithí mhaith ag Flanagan air agus na foirne seo imeartha aige le blianta beaga anuas.
“Nuair a fhéachaim ar na himreoirí atá sna línte lántosaithe ag Corcaigh agus Tiobraid Árann, tá siad ar fad difriúil,” a dúirt sé.
“Cruthaíonn siad fadhbanna éagsúla duit. Nuair a fhéachann tú ar Chorcaigh, tá siad díreach, tá siad lán le luas agus le gluaiseacht. Sin an rud is dainséaraí faoi Chorcaigh, an chomhimrt agus an ghluaiseacht.
“Ar an taobh eile, tá Tiobraid Árann go hiomlán difriúil. Nuair atá tú ag rith in aice le John McGrath nó Jason Forde, ní hí an chéad liathróid an ceann a chaithfidh tú faire uirthi ach uaireanta an dara ceann nó an tríú ceann,’ ar sé.
“Tá siad chomh glic sin mar imreoirí agus tá siad chomh snasta go gcruthaíonn siad rudaí éagsúla mar ghrúpa.”
Tá an t-eagrán speisialta de ‘An Pod Spórt’ ar fáil ar shuíomh Tuairisc, ar Spotify agus ar Apple Podcasts
Fág freagra ar '‘Ní thabharfadh aon rud sonas níos mó dúinn cois Laoi ná bonn uile-Éireann a bheith ag Patrick Horgan’ – John Allen'