Léarscáil i mBéarla amháin gan aon ‘Mumbo-Jumbo to offend or confuse the traveller’

Tá scaipeadh mear á dhéanamh ar líne ar léarscáil bhréige Bhéarla á cruthaíodh chun aird a tharraingt ar shaibhreas logainmneacha dúchasacha na hAlban.

Níl aon lorg den Gàidhlig, nó ‘foreign Mumbo-Jumbo’, ar an léarscáil d’iarnród na hAlban a rinneadh mar scigmhagadh ar mheon an aonteangachais.

Andy Arthur a chruthaigh an léarscáil chun léargas a thabhairt ar a bhoichte is a bheadh oidhreacht na hAlban dá mbeifí ag brath ar an Bhéarla amháin.

“Not Spoken Here”, the Monoglot’s railway map of East and Central Scotland, with no Gaelic, Celtic or other foreign Mumbo-Jumbo to confuse or offend the traveler. (Ironically, this is going to cost millions in new station signs)https://t.co/HboiUAEZ9E pic.twitter.com/eF9FdmVfSz

— Andy Arthur (@cocteautriplets) 22 Bealtaine 2018

Ag labhairt dó leis an nuachtán The National, dúirt Arthur gur chruthaigh sé an léarscáil aonteangach le cur abhaile ar lucht ‘an Bhéarla amháin’ a áiféisí is atá sé a bheith i gcoinne an Gàidhlig nó teanga ar bith eile. 

Dúirt Arthur go bhfuil eolas “luachmhar” sna logainmneacha Gàidhlig, agus i logainmneacha teangacha eile, faoin  “tírdhreach”, agus faoi “na daoine a d’imigh romhainn”.

Ar léarscáil Arthur, ‘Not spoken here – a Monoglot’s railway map of central and east Scotland’ baintear úsáid as leaganacha nua Béarla atá bunaithe ar bhunbhrí na logainmneacha Gàidhlig.

Mar sin, ‘Church of Speckled Stone High’ an t-aistriúchán nua atá ag Arthur ar An Eaglais Bhreac, seachas Falkirk High, an logainm oifigiúil Béarla.

Dúirt sé nach mbíonn mórán eolais sna logainmneacha oifigiúla Béarla faoi na háiteanna lena mbaineann siad agus gur ar mhaithe le “pointe a dhéanamh” a chruthaigh sé an léarscáil.

“Is é an pointe ná gur bhronn an Gàidhlig, agus teangacha eile, orainn oidhreacht shaibhir ó thaobh na logainmneacha de, agus d’uireasa tuiscint a bheith againn orthu ní bheadh a fhios againn cén áit go díreach in Albain a bhfuil muid, agus is ar an chúis sin a roghnaigh mé léarscáil scéimreach, ionas nach mbeadh aon leideanna tíreolaíochta le feiceáil,” a dúirt Arthur.

Tá sé ina raic faoi cheist na gcomharthaí dátheangacha in Albain le tamall.

Tharraing alt faoin gcomharthaíocht dhátheangach le Brian Beacom, colúnaí de chuid The Herald, go leor conspóide an mhí seo caite. Mhaígh Beacom gur cheart ligint don Ghàidhlig, “bás a fháil mar a fuair an Laidin roimpi”.