Heimir Hallgrímsson na hÍoslainne ceaptha ina bhainisteoir ar Éirinn

Tá Heimir Hallgrímsson as an Íoslainn ceaptha ina bhainisteoir ar fhoireann sacair na hÉireann.

Ocht mí a bhíothas ag cuardach comharba Stephen Kenny ach tháinig ceapachán Hallgrímsson aniar aduaidh ar dhaoine ó tharla nach raibh sé ar an liosta fada daoine a bhí á lua leis an bpost.

D’fhág Hallgrímsson, atá 57 bliain d’aois, a phost mar bhainisteoir ar Iamáice nuair a díbríodh as Copa Mheiriceá iad ag deireadh na míosa seo caite nuair a bhuail Veiniséala iad.

Bhí sé i bhfeighil ar Iamáice do 27 cluiche. Bhuaigh sé deich gcinn, chaill sé deich gcinn agus comhscór a bhí sna seacht gcluiche eile.

Bhí Hallgrímsson ina chomhbhainisteoir ar an Íoslainn, in éineacht le Lars Lagerback, nuair a d’éirigh leo an ceann is fearr a fháil ar Shasana ag craobh na hEorpa in 2016, bua stairiúil.

Bhí an fiaclóir ina bhainisteoir as féin ar a thír dhúchais ina dhiaidh sin nuair a cháiligh siad do Chorn an Domhain in 2018, an chéad uair acu an comórtas sin a bhaint amach.

In aghaidh Shasana i Sraith na Náisiún i mí Mheán Fómhair a bheidh a chéad chluiche ag Hallgrímsson mar bhainisteoir na hÉireann.

Bhain go leor bráca le cuardach an bhainisteora nua d’Éirinn agus faoi dhó a tugadh isteach John O’Shea mar bhainisteoir eatramhach.

Bhí go leor bainisteoirí á lua leis an bpost, ina measc Lee Carsley, Roy Keane, Gus Poyet Neil Lennon, Chris Coleman, agus Chris Hughton.