Seoladh dhá leabhar, Filí Luimnigh gan Iomrá san Ochtú hAois Déag leis an Dr. Úna Nic Éinrí agus An eala ar a bhfuaid: Cúirt an Mheán Oíche i Lámha na Scríobhaithe leis an Dr. Liam Mac Peaircín, ag ócáid i gColáiste Mhuire gan Smál le déanaí.
52 dán le dáréag file atá curtha in eagar ag Úna Nic Éinrí, iad roinnte de réir téamaí agus nótaí mínithe agus beathaisnéisíní sa leabhar leis. Ceithre leagan de théacs Chúirt an Mheán Oíche Mherriman atá i leabhar Liam Mhic Peaircín maraon le leagan d’aistriúchán Béarla Dennis Woulfe.
Dúirt Máire Ní Neachtain, Ceann Roinn na Gaeilge i gColáiste Mhuire gan Smál, a sheol an dá shaothar gur údar “ceiliúrtha agus bróid” a bhí i seoladh na leabhar don Roinn, don Choláiste agus “do cheantar Thuamhan”.
“Scoláireacht ar ardchaighdeán a éilíonn tóraíocht mhór, grinnstaidéar, mionléamh, léirmhíniú, staidéar comparáideach agus anailís bheacht, chruinn atá sa dá leabhar seo. Ad fontes a mholtar don taighdeoir agus sin a rinne an bheirt seo go stuama agus go foighdeach,” a dúirt Máire Ní Neachtain.
Dúirt Ceann Roinn na Gaeilge i gColáiste Mhuire gan Smál go gcuireann an dá shaothar nua “go mór lena bhfuil ar eolas cheana féin faoi léann agus faoi úsáid na Gaeilge i Luimneach agus i dTuaisceart na Mumhan san ochtú céad déag agus gur taca an-luachmhar iad dóibh siúd ar spéis leo cúrsaí staire agus teanga”.
