Bhuel, tá an lá mór buailte linn arís. Rachaidh lucht tacaíochta Chorcaí suas chuig príomhchathair na tíre ina mílte. Léiríodh arís sa chluiche leathcheannais coicís ó shin an grá atá ag an bpobal, idir óg agus aosta, don fhoireann seo. B’iontach an radharc é an líon mór páistí a bhí ag an gcluiche sin.
Faraor, an deireadh seachtaine seo agus ticéid gann, beidh ar fhormhór na bpáistí fanacht sa bhaile agus féachaint ar an gcluiche ar an teilifís.
Bhí foireann Chorcaí anseo anuraidh ar ndóigh ach braitheann sé gur tamall fada ó shin é sin anois agus níl aon dabht ach go ndearna na himreoirí obair mhór chun a mbealach a dhéanamh chomh fada leis an gcluiche ceannais arís.
Bunaithe ar an taispeántas sa chluiche leathcheannais, tá na scóranna ag teacht go héasca dóibh agus is dócha gur foireann níos fearr iad ná mar a bhí anuraidh. Tá Alan Connolly ar ais arís ag an leibhéal a bhí aige dhá shéasúr ó shin, nuair a bhí sé ag scóráil na hat tricks go rialta. Le Brian Hayes agus agus Patrick Horgan, gan dabht sí an líne lántosaithe is fearr sa tír í faoi láthair.
Ach beidh Tiobraid Árann leo agus dul chun cinn suntasach déanta acusan freisin ón séasúr díomách a bhí acu anuraidh. Léiríodar meon láidir i bPáirc an Chrócaigh sa chluiche leathcheannais in aghaidh Chill Chainnigh nuair a tháinig siad tríd, in ainneoin a bheith fear gann don 15 nóiméad deiridh, chun an chéad chluiche ceannais sinsir riamh idir Tiobraid Árann agus Corcaigh a chinntiú.
Ba é buaicphointe an chluiche sin domsa ná an cúl cróga a scóráil Oisín O’Donoghue ag deireadh an 70 nóiméad. Bhí an réiteoir, James Owens, tar éis buntáiste a thabhairt dó agus d’ardaigh an fear óg ó Chumann an Rí Cormac i gCaiseal an bhratach ghlas don dara cluiche as a chéile.
Ní dóigh liom gur cheap mórán leantóirí go mbeadh na Tiobraid Árannaigh fós ina seasamh faoi dheireadh na craoibhe. Tá míorúilt de shórt déanta ag Liam Cahill agus a mheitheal bainistíochta, agus ag na himreoirí gan dabht, chun an fhoireann seo a thabhairt chuig cluiche ceannais 2025.
Tá dúshlán mór os a gcomhair amach amárach, áfach. Conas is féidir leo stop a chur le tosaithe Chorcaí? Is tasc an-deacair é. Caithfidh siad iarracht a dhéanamh an líne lánchúil a chosaint agus ag an am céanna brú a chur ar an liathróid amach faoin bpáirc. An imreoidh Rónán Maher ag uimhir a 6 agus an dtitfidh sé siar, nó an ndéanfaidh sé a shlí isteach le Brian Hayes a mharcáil ar imeall na cearnóige? Beidh ar Thiobraid Árann oibriú go dian timpeall lár na páirce, rud a bhfuil siad go maith aige.
Beidh fadhb den chineál céanna ag Corcaigh ar an taobh eile. Tá tosaithe thar a bheith contúirteach ag Tiobraid Árann, mar sin caithfidh Rob Downey mar leathchúlaí láir cinneadh a dhéanamh an leanfaidh sé Andrew Ormond, nó an gcosnóidh sé an líne lánchúil?
Bhuaigh Corcaigh na ceithre chluiche craoibhe deireanacha idir na foirne ach ní chiallaíonn sin go mbeidh an bua acu amárach. Is féidir a shamhlú go raibh Noel McGrath ag insint dá chomrádaithe óga an tseachtain seo faoi 2010 agus 2019, agus faoin gcaoi gur tháinig Tiobraid Árann ar ais ó chluichí i gCúige Mumhan a chailliúint le 10 agus 12 pointe, in aghaidh Chorcaí agus Luimnigh faoi seach, sular chuaigh siad ar aghaidh chun craobhacha na hÉireann a bhuachan an dá bhliain sin.
Ach ag an deireadh sílim go mbuafaidh Corcaigh an cluiche ceannais. Tá foireann níos cothroime acu agus le taithí na bliana seo caite, ba cheart go mbeidís in ann déileáil níos fearr leis an ullmhúchán roimh an gcluiche. Ní dóigh liom go mbeidh Tiobraid Árann in ann greim a choinneáil ar thosaithe Chorcaí go léir. Is bainisteoir den scoth é Liam Cahill agus tá an bua faighte aige ar fhoirne ó Chorcaigh i gcluichí ceannais faoi aois nuair a buadh orthu go héasca sna cluichí babhtaí.
Ba cheart gur ócáid den scoth a bheadh ann.
Fág freagra ar 'Ceachtanna na bliana seo caite foghlamtha ag Corcaigh agus beidh siad ullamh don lá mór'