Michael Frank Ó Confhaola, as Muiceanach idir Dhá Sháile, a ghnóthaigh an chéad áit sa chomórtas nua amhránaíochta ar an sean-nós – Corn Chathair na Gaillimhe.
Bronnadh Corn Chathair na Gaillimhe air agus duais €300.
Tháinig Róisín Seoighe as Ros a’Mhíl sa dara háit agus Áighne Ní Chadhain as Leitir Mucú sa tríú háit. Bhronn an moltóir, Éamonn Ó Bróithe, dhá dhuais aitheantais mar chuid den fhéile freisin. Bronnadh ceann amháin de na duaiseanna aitheantais ar Cholm Ó hEartáin as Baile an Fheirtéaraigh agus an ceann eile ar Sheán Ó Gráinne as Maigh Eo ó dhúchas, ach a bhfuil cónaí air i gCois Fharraige le blianta fada.
Cuireadh Corn Chathair na Gaillimhe, comórtas nua amhránaíochta ar an sean-nós, ar bun den chéad uair an deireadh seachtaine seo caite mar chuid d’imeachtaí Fhéile Shean-Nós na Gaillimhe.
Ba í seo an chéad bhliain ag an bhféile a bhfuil sé d’aidhm aici ceiliúradh a dhéanamh ar an gceol agus an amhránaíocht thraidisiúnta taobh leis na ‘traidisiúin’ nua atá ag teacht chun cinn i nGaillimh le pobail éagsúla.
Is in Áras na nGael ar Shráid Dhoiminic i nGaillimh a cuireadh na himeachtaí ar bun. Ba í Alanagh Ní Chonghaile Ní Ghríofa stiúrthóir ealaíne na féile agus ba é Micheál Mac Aoidh, Oifigeach Forbartha le Gael Forbairt na Gaillimhe, a léirigh.
Bhí slua maith i láthair ag an bhféile in Áras na nGael agus ag an seisiún ceoil i gClub Áras na nGael ina dhiaidh sin. Tá súil ag an gcoiste eagrúcháin go mbeidh an fhéile ar bun arís an bhliain seo chugainn agus go mbeidh sí mar chuid de chlár imeachtaí na bliana i gcathair na Gaillimhe.
Reáchtáladh an fhéile le tacaíocht ó chiste Féilte Fhoras na Gaeilge agus Gael Fhorbairt na Gaillimhe. Féile trí lá a bhí inti ón 10 go 13 Iúil agus bhí clár breá imeachtaí leagtha amach idir cheardlanna, cheolchoirm agus chomórtas amhránaíochta.
Chomh maith leis an gCorn féin bhí ceithre rannóg eile sa gcomórtas. Bhí meascán de cheol agus damhsa na hÉireann ar an gclár chomh maith le ceol agus amhráin ón mBrasaíl.
An Teanga Bheo
Maith sibh pobal na Gaillimhe fair pay do Connemara arist abú