Stádas rogha na n-údar tuillte ag Dún na nGall ach ní chuirfidh sé as don Mhí

35 bliain tar éis dóibh casadh ar a chéile sa gcraobh den chéad uair riamh i mbabhtaí leathcheannais na hÉireann 1990, casfaidh peileadóirí na Mí agus Dhún na nGall ar a chéile arís agus áit i gcluiche ceannais na hÉireann ar fáil.

Fir na Mí a thug an lá leo sa gcéad chluiche sin idir na foirne ach na Conallaigh a bhí i gceannais ó shin agus cluichí in 2002, 2017 agus 2019 buaite acu. Is iad Dún na nGall rogha na coitiantachta chun coimhlint an lae inniu a bhuachan chomh maith agus foireann Jim McGuinness ag bogadh ar aghaidh díreach mar a bheadh sé ag súil leis.

Bhain an fhoireann Craobh Uladh anuraidh sa gcéad bhliain ar ais ag McGuinness sular chaill siad géarchoimhlint in aghaidh na Gaillimhe i mbabhtaí leathcheannais na hÉireann. Tá an chuma ar an scéal go bhfuil céim chun cinn tógtha ag an bhfoireann ó shin, áfach. Thugadar Corn an Anglo-Celt leo arís an samhradh seo agus lucht tacaíochta na gConallach muiníneach nach gclisfidh arís orthu ar an lá mór.

Ina gcoinne tráthnóna tá foireann na Mí a bhfuil dul chun cinn iontach déanta acu féin faoi cheannas Robbie Brennan, a tháinig isteach ag tús na bliana. Tar éis dóibh Gaillimh a chloí sna babhtaí ceathrú ceannais coicís ó shin, dúirt Jordan Morris nár chreid aon duine lasmuigh den phainéal go bhféadfadh siad dul chomh fada seo sa gcraobh agus is cinnte go bhfuil an ceart aige.

Is cinnte freisin go bhfuil go bhfuil áit sa gcluiche seo saothraithe go maith ag contae na Mí. Chomh maith leis an mbua sin in aghaidh na Gaillimhe, tá Ciarraí agus Áth Cliath sáraithe acu chomh maith agus nach mór beag is fiú déanta den chailliúint in aghaidh chontae Lú i gcluiche ceannais Laighean.

Léiríodh muinín na foirne sa gcluiche in aghaidh na Gaillimhe nuair a d’éirigh lena gcéilí comhraic 2-3 a aimsiú in achar cúpla nóiméad chun dul chun cinn agus ceathrú uaire fágtha ach d’éirigh le contae na Mí cúrsaí a shocrú arís agus seo leo chun cinn arís leis an gcúl a d’aimsigh Jordan Morris agus d’fhanadar chun cinn as sin go deireadh. Níl mórán foirne i Roinn 2 na sraithe a bheadh in ann é sin a dhéanamh i gcoinne ceann de bhoic mhóra na peile agus léiríonn sé an obair atá déanta ag Brennan ó tháinig sé isteach.

Tá moladh mór tuillte ag na himreoirí freisin, áfach, agus laochra tagtha chun cinn. D’aimsigh Morris 1-6 sa gcluiche in aghaidh na Gaillimhe agus Johnny McGrath céasta aige ach bhí tionchar beagnach chomh mór céanna ag Matthew Costello agus é tagtha ar ais ó ghortú.

An phríomhsprioc a bheidh ag cosaint Dhún na nGall ná an bheirt sin a stopadh. Cuirfear Brendan McCole ar dhuine acu, Morris ba dhóigh leat, agus d’fhéadfaí Caolán McColgan a fheiceáil ag leanúint Costello, ach is minic le Dún na nGall na cosantóirí eile a fhágáil ag tabhairt aire dá bpaistí féin agus gan a bheith dírithe ar aon imreoir amháin a mharcáil.

Chruthaigh Muineachán an-chuid fadhbanna dóibh sa gcéad leath den chluiche ceathrú ceannais agus iad ag iarraidh na cosantóirí a bhí timpeall an stua 40m a tharraingt anonn agus anall agus d’fhéadfaí Dónal Keogan, Seán Coffey agus Ciarán Caulfield a fheiceáil ag teacht aníos ón líne leathchúil chun sin a dhéanamh le spás a chruthú do leithéidí Morris, Costello nó Eoghan Frayne.

Beidh an Mhí ag iarraidh Shaun Patton a chur faoi bhrú ón gcic amach freisin mar tá siad an-láidir i lár na páirce le Bryan Menton agus Adam O’Neill, chomh maith le Conor Gray, a bhí ar fheabhas nuair a tháinig sé isteach in aghaidh na Gaillimhe.

D’éirigh le contae na Mí an liathróid a bhaint de Ghaillimh go minic sa gcluiche sin agus 2-6 aimsithe acu ó na haistrithe seilbhe sin, ach cheapfá nach mbeadh Dún na nGall chomh scaoilte sin agus seilbh na liathróide acu.

Bhí Conor agus Shane O’Donnell ar fheabhas ar fad sa teacht aniar in aghaidh Mhuineacháin agus rinne siad an rogha cheart beagnach chuile uair. Beidh coimhlint iontach ann idir Michael Murphy agus Seán Rafferty ach fiú má éiríonn le lánchúlaí na Mí Murphy a choinneáil gan scór, bíonn sé thar a bheith deacair an tionchar a bhíonn aige ar imirt Dhún na nGall a mhaolú.

D’fhéadfadh gur céim rómhór a bheadh anseo don Mhí, ach tá sé sin ráite roimhe seo agus freagra tugtha.