Tá Ollamh leis an Léann Ceilteach in Ollscoil Oxford le ceapadh den chéad uair le hocht mbliana agus £3.25 milliún bailithe chun an ollúnacht a shábháil.
Tá tús á chur leis an bpróiseas earcaíochta don ollamh nua. Is í seo an t-aon ollúnacht sa léann Ceilteach in aon ollscoil i Sasana.
Dúirt an tOllamh Nigel Shadbolt, ceann Jesus College, mar a bhfuil an ollúnacht lonnaithe, go raibh an baol ann nach mbeadh Ollamh leis an Léann Ceilteach go deo arís in Oxford murach an feachtas bailithe airgid chun an ollúnacht a shábháil.
“Ní raibh Ollamh leis an Léann Ceilteach in Oxford ó 2011, agus bhí an baol ann go n-imeodh an post ar fad. A bhuíochas le tacaíocht fhlaithiúil iarmhic léinn agus cairde, tá an ollúnacht slán. Déanfar athbheochan ar an léann Ceilteach in Oxford, agus ar mhaoiniú a fháil do scoláireachtaí iarchéime a bheidh an bhéim anois,” arsa Shadbolt.
Dúirt an tOllamh Karen O’Brien, ceann roinn na ndaonnachtaí in Oxford gurb ionann an Léann Ceilteach agus “snáth ógra” i dtraidisiún léinn na hollscoile.
Bunaíodh Cathaoir Íosa sa Léann Ceilteach (The Jesus Chair of Celtic) in Oxford in 1876 agus cúigear ollúna ar fad a bhí ann ó ceapadh John Rhys mar an chéad ollamh sa phost go dtí gur tháinig deireadh le téarma Thomas Charles-Edwards in 2011.
Tháinig £1.35 milliún den airgead tarrthála ó Jesus College agus Ollscoil Oxford agus tháinig an £1.9 milliún eile ó dhaoine a thacaigh leis an bhfeachtas bailithe airgid.
Glyndŵr
Agus £500,000 ó Ollscoil na Breataine Bige UWTSD. Nach iontach iad muintir na Breataine Bige agus ós cionn £6,000,000 de ghearradh ar bhuiséad UWTSD, postanna caillte etc. go raibh siad in ann tacú le ceann de na hinstitiúidí léinn is saibhre ar domhan.
Aine Ni Fhiannusa
Maith sibh, a iarmhic léinn agus a chairde, Coláiste Oxford agus Coláiste Íosa – an cathaoir seo a athbheocan. Is rud tábhachtach stairiúil dúinn go léir mar Ceilt foinse eolais mar atá sa choláiste seo a chosaint, a chaomhnú agus a bheatha. Tá éileamh air, agus beidh an snáth órga ar fáíl dos na glúinte le teacht.