Tá dhá leabhar ilmheán idirghníomhacha, Scéal 1916 agus The Story of 1916, ina ndéantar cur síos ar an méid a tharla i mBaile Átha Cliath le linn Éirí Amach 1916, seolta ag Scoil an Oideachais in Ollscoil na hÉireann, Gaillimh.
Is é Seán Ó Grádaigh, léachtóir de chuid Ollscoil na hÉireann, Gaillimh a rinne na leabhair i gcomhar le Century Ireland, Boston College, Leabharlann Náisiúnta na hÉireann, COGG agus Scoil an Oideachais, OÉ Gaillimh.
“Is iBooks iad na háiseanna seo ar úsáideach iBooks Author chun iad a chur i dtoll a chéile,” a dúirt Seán Ó Grádaigh. “Freastalaíonn na leabhair ar riachtanais na gcineálacha éagsúla foghlaimeoirí ar bhealach nach bhféadfadh leabhar clóite a dhéanamh riamh a bhuí leis an ábhar digiteach, an idirghníomhaíocht agus an measúnú atá lárnach sna leabhair.”
Dúirt Uachtarán Ollscoil na hÉireann, Gaillimh, Dr Jim Browne, ag an seoladh: “Is bliain speisialta í seo do shaoránaigh uile na hÉireann chun machnamh a dhéanamh ar stair na tíre. Cinntíonn an togra seo go bhfuil uirlis iontach idirghníomhach ag scoileanna le go mbeidh múinteoirí agus daltaí in ann foghlaim faoi Éirí Amach 1916 ar bhealach atá spraíúil agus fuinniúil. Is cúis áthais dom go raibh baint ag Ollscoil na hÉireann, Gaillimh leis an togra seo agus ba mhaith liom comhghairdeas a dhéanamh le Seán Ó Grádaigh agus leis an bhfoireann uile faoin bhfoilseachán tarraingteach seo a chur le chéile.
Dúirt John Concannon, Stiúrthóir ar Ireland 2016, “Ag cur beocht agus beatha sa stair don aos óg, sin ceann de chroí-aidhmeanna chlár comórtha céad bliain 2016. Sampla iontach is ea an leabhar ilmheán seo ar conas an sprioc sin a bhaint amach. Tá an-áthas orainn tacú leis.”
Seoladh Scéal 1916 & The Story of 1916 Dé hAoine seo caite i Scoil Chroí Íosa, Bóthar an Chaisleáin Nua, Gaillimh. Is féidir na leabhair a íoslódáil saor in aisce ón iBook Store anseo.
