Beidh an leabhar dátheangach nua, 'Ráth Chairn , An Talamh Bán, The Promised Land' le Matt Nolan á sheoladh in Áras Pobail Ráth Chairn ag a 7.00pm an Domhnach beag seo, an 9 Nollaig. Scéal 40 teaghlach as Conamara a d'aistrigh go Ráth Chairn agus a bhunaigh Gaeltacht láidir bhríomhar bhródúil ansin agus tá breis is 300 pictiúr sa leabhar a thóg Matt féin leis na blianta, chomh maith le cinn eile a bhaineann le bunú Ghaeltacht Ráth Chairn
Máirtín Chóil Neaine Pháidín Mac Donncha, an máistir seanchais, foinn, filíochta is damhsa, ag rince ríl sa chlub i Ráth Chairn ag Féíle na Mí in 2004. Beidh leabhar Matt Nolan á sheoladh i Ráth Chairn féin Dé Domhnaigh ag Máirtín Tom Sheáinín. An tAire Stáit Seán Kyne a sheolfaidh an leabhar i gConamara, Tí Mhichael Jack, Béal an Daingin, Dé Luain, an 10 Nollaig agus bean Ráth Chairn, Bláthnaid Ní Chofaigh, a dhéanfaidh an cúram sin i mBaile Átha Cliath, mar a seolfar é ar an 14 Nollaig i Siopa Leabhar Chonradh na Gaeilge.
Mí Iúil 1998, thug Micheál agus Seán Ó Conaire a gcuairt dheireanach ar a bhfód dúchais, an Máimín i Leitir Móir. Síos an bóithrín seo go huaigneach a chuaigh siad féin agus a muintir i 1935 le ghabháil ar an mbus go Ráth Chairn, ‘An Talamh Bán’
Máire agus Caitlín Ní Mhéalóid ina réaltaí teilifíse
Cuid de na fir a chuaigh ar an Turas Aniar ar rothair go Baile Átha Cliath an 29 Márta 1934 le bualadh le de Valera agus talamh agus cearta á n-éileamh acu. Ar a mbealach isteach go dtí áras Chonradh na Gaeilge atá siad sa phictiúr
Pádraic Tom Phaitch Ó Ceannabháin, fonnadóir mór le rá as Carna, ag guí ag uaigh Choilm de Bhailís i 1998. Ba mhinic Pádraic i Ráth Chairn ag féilte is éigsí
Baile Átha Cliathach agus Tiobraid Árannach taobh amuigh dá dteach i Ráth Chairn glas na Mí. Bhog an bheirt mhúinteoirí, Anna Ní Dhonncha agus Simon Ó Cróinín, go Ráth Chairn sna 1980idí agus tá a lorg fágtha acu ar gach gné de shaol an phobail
An óige go deo i Ráth Chairn!
Ag sábháil an fhéir an chéad samhradh i Ráth Chairn i 1935. Na comharsana ag tabhairt cúnamh do mhuintir Chonaire ag déanamh coca mór féir don gheimhreadh. Ó chlé: Colm Ó Gríofa, Seán Ó Catháin, Micheál Seoighe, Micil Ó Conaire, Micheál Ó Conaire agus Pádraic Ó Conaire
Aifreann á cheiliúradh ar Inis Treabhair ag an Athair Micheál Ó Braonáin in 2014. As an oileán seo amach ó Eanach Mheáin a chuaigh muintir Phádraic Choilm Uí Chonghaile go contae na Mí i 1935. Tagann muintir an oileáin agus a sliocht ar ais chuile bhliain le haghaidh an aifrinn
Rugadh Nan Mhic Dhonncha ar Inis Treabhair i gConamara agus bhí sí ar an gcéad bhus go Ráth Chairn i 1935. Seo í Nan ag Féile na Mí i 1998 lena triúr iníonacha, Bríd Uí Chiaráin, Áine Uí Shúilleabháin agus Kate Uí Bhroin
John Chonraí ag réiteach braon tae ina chistin féin i Ráth Chairn, mar ar tháinig sé féin agus a mhuintir i 1935
Fir Chonamara ó Cheantar na nOileán agus Chois Fharraige ag féachaint amach ar mhachaire méith na Mí sula ndearna siad cinneadh aistriú go Ráth Chairn
Úsáid Fianáin:
Baineann an suíomh greasáin Tuairisc.ie úsáid theoranta as fianáin chun críche fheidhmiú éifeachtach an fhreastalaí agus chun na críche sin amháin; Mura roghnaíonn tú féin clárú linn, ní dhéantar aon sonraí pearsanta a stóráil, a aisghabháil ná a aistriú chuig tríú páirtí go huathoibríoch. Is ionann leanúint d’úsáid an tsuímh seo agus deimhniú go bhfuil comhaontú intuigthe ann go ngéilleann an cuairteoir don seasamh sin agus go nglacann sé/sí leis go bhfuil sé fíor. Chun fanacht ar an suíomh seo brú ar an gcnaipe seo:Ok
Fág freagra ar 'GAILEARAÍ: Léargas trí lionsa Matt Nolan ar scéal agus ar phobal Ráth Chairn…'