Ag ócáidí ar an Luan an 25 Bealtaine agus ar an Máirt an 26 Bealtaine 2015 in Ionad Oideachais Thrá Lí bronnadh gradaim ar roinnt den 1,582 dhalta as Ciarraí a scríóbh, a dhear agus a d’fhoilsigh leabhair dá gcuid féin i nGaeilge mar chuid den tionscadal Scríobh Leabhar Fhoras na Gaeilge. Is í Caitríona Ní Shúilleabháin, moltóir ar an gclár teilifíse Glór Tíre agus ball de Bhord Fhoras na Gaeilge, a rinne an bronnadh.
Daltaí as naoi scoil déag i gceantar Chiarraí a ghlac páirt in Scríobh Leabhar, i measc suas le 6,500 dalta bunscoile ar fud na hÉireann a scríobh scéal dá gcuid féin i nGaeilge faoin iliomad ábhar. Déantar Scríobh Leabhar a reáchtáil sa cheantar seo trí Ionad Oideachais Thrá Lí i gcomhar le Foras na Gaeilge. Beidh ócáidí eile ar aon dul leis na searmanais seo ar siúl i gceantair eile as seo go deireadh na scoilbhliana .
Tá páirt glactha ag níos mó ná 35,000 dalta sa tionscadal Scríobh Leabhar ó cuireadh ar bun é sa scoilbhliain 2006/2007.
“Is deis iontach é seo do leanaí spraoi a bhaint as an nGaeilge agus ag an am céanna a gcuid samhlaíochta a léiriú,” a dúirt Aedín Ní Bhroin, Stiúrthóir Chlár na Leabhar Gaeilge, Foras na Gaeilge.
“Scríobhann siad faoi gach cineál ábhar, óna laethanta saoire lena muintir, a n-eachtraí lena gcairde, a gcuid peataí agus an saol mór trína súile féin. Ní hamháin go ligeann an scéim seo dóibh leabhar dá gcuid féin a chruthú, idir a scríobh agus a mhaisiú, ach is iontach an bealach é freisin chun misneach a chothú iontu as an gcumas Gaeilge atá acu”, a dúirt sí.
Fág freagra ar 'GAILEARAÍ: Gradaim ‘Scríobh Leabhar’ bronnta ar dhaltaí as Ciarraí'