‘Don’t go into town today – there’s a rebellion on!’ Sin an chomhairle a cuireadh ar chailín óg amháin le linn Éirí Amach na Cásca. Tá a scéal siúd i measc an illiomaid scéalta a bhfuil fáil orthu i ‘Scéalta Bhaile Átha Cliath 1916’ atá á ndigitiú ag Críostóir Mac Carthaigh agus Jonny Dillon.
Cuireadh cuid de na scéalta sin i láthair ag an chomhdháil idirnáisiúnta idir-institiúideach ‘Torthaí na Réabhlóide’ a bhí ar siúl ag an deireadh seachtaine i Scoil na Gaeilge, an Léinn Cheiltigh agus an Bhéaloidis UCD.
Bhí neart ábhar machnaimh in óráid oscailte Chláraitheoir Ollscoil Náisiúnta na hÉireann, an Dr Attracta Ní Ailpín, don slua a bhí i láthair i Músaem na bPiarsach tráthnóna Dé hAoine. Thug an tOllamh Jerry White, Cathaoir an Léinn Eorpaigh i gCeanada, léargas úr dúinn ar Mise Éire agus Tine Bheo agus léiríodh an tionchar mór ag scannánaíocht na Sóivéadach ar an ré réabhlóideach scannánaíochta.
Is i Scoil na Gaeilge, an Léinn Cheiltigh agus an Bhéaloidis UCD a lean an chomhdháil Dé Sathairn le taispeántas d’ábhar nua a bhain le Dubhghlas de hÍde, an Piarsach agus Conradh na Gaeilge.
Bunaithe ar an anailís a rinne an Dr Éilis Ní Dhuibhne ar ról na mban i bhforbairt na litríochta is léir go bhfuil sé thar am ligint do scríbhneoireacht na mban teacht in inmhe.
Comdháil chomhoibritheach a bhí anseo agus ionadaithe ó institiúidí náisiúnta agus idirnáisiúnta ar an gcoiste; Regina Uí Chollatáin agus Meidhbhín Ní Urdáil (COBÁC) Máirín Nic Eoin, Ríona Nic Congáil agus Pádraig Ó Liatháin (Coláiste Phádraig OCÁC), Roisín Ní Ghairbhí (Coláiste Mhuire, Luimneach), Brian Ó Conchubhair (Notre Dame) agus Pádraig Ó Siadhail (Ollscoil Naomh Mhuire, Ceanada). Ghabh an coiste buíochas le Coiste Dheich mBliana na gCuimhneachán UCD, le scéim rialtais ‘An Teanga Bheo’ agus le Coiste Taighde Coláiste Phádraig as an tacaíocht a cuireadh ar fáil.
Fág freagra ar 'GAILEARAÍ: ‘Torthaí na Réabhlóide’ in UCD – ‘Don’t go into town today – there’s a rebellion on!’'