‘Cén áit is fearr le bualadh le cairde ná ag mórfhéile na nGael?’

Céard is cuimhin leat faoi do chéad Oireachtas? 

Chuaigh mise chuig mo chéad Oireachtas i nDún Garbhán i 1999. Bhí sé ar siúl in Óstán na Páirce ansin. Ní bhíodh baol ar an oiread daoine ag an Oireachtas sna blianta sin. Is cuimhin liom Club na Féile a bheith thar barr ar fad, chuile dhuine ar an urlár ag déanamh An Staicín Eorna, Ballaí Luimnigh, Baint an Fhéir, Ionsaí na hInse agus na damhsaí sin ar fad. Is cuimhin liom go raibh seisiún amhránaíochta ina dhiaidh agus lean sé sin ar aghaidh go maidin. Bhí seisiún amhránaíochta den scoth againn i rith an lae Dé Sathairn i Mooney’s sa Rinn, agus bhí go leor de laochra móra an tsean-nóis ann, atá imithe ar shlí na fírinne ó shin, beannacht Dé leo. Níor ghlac mé aon pháirt sna comórtais an bhliain sin.  

An rud is fearr faoin Oireachtas?  

An comhluadar – bualadh le cairde, b’fhéidir nach bhfaca duine ó Oireachtas na bliana roimhe sin.  Cén áit is fearr le sin a dhéanamh ná ag mórfhéile na nGael!  

An rud is measa faoin Oireachtas? 

Nuair a thagann deireadh leis agus nuair a bhíonn orainn aghaidh a thabhairt ar an mbóthar abhaile agus a bheith réidh le dhul ar ais ag obair Dé Luain. 

Cill Airne arís? 

Is breá liomsa Cill Airne. Tá na háiseanna ar fad faoi aon díon amháin. Tá eolas maith againn ar an óstán anois agus is féidir linn ár mbealach a dhéanamh thart go héasca. Bíonn an-spraoi ag na gasúir. Tá cleachtadh mhaith ag foireann an óstáin ar an Oireachtas anois agus bíonn siad dea-eagraithe dá réir. 

Comhairle don té atá ag freastal ar a chéad Oireachtas 

Déan iarracht blaiseadh a fháil de na himeachtaí éagsúla a bhíonn ar siúl. Bain sult as! 

Club na Féile nó Corn Uí Riada? 

Is é Corn Uí Riada buaicphointe an Oireachtais domsa. Tógadh mise ag éisteacht le Corn Uí Riada ar Raidió na Gaeltachta agus bhí sé an-speisialta ar fad.  Ba mhór an onóir dom a bheith páirteach i gCorn Uí Riada i gcaitheamh na mblianta agus an stáitse a roinnt le fonnadóirí eile a bhfuil an oiread sin measa agam orthu. B’údar mór bróid dom gur bronnadh Corn Uí Riada orm trí huaire.  

Ar ndóigh ní bheadh fhios againn go mbeadh muid ag an Oireachtas gan tamall den oíche a chaitheamh ag Club na Féile. Bíonn atmaisféar iontach ann i gcónaí. 

Dá mbeifeá i bhfeighil ar an Oireachtas, céard iad na hathruithe a dhéanfá? 

Cuirim suim ar leith sna comórtais agus sílim go mbeadh sé go maith breathnú ar chúrsaí moltóireachta. Déarfainn féin gur chóir go mbeadh deis ag na moltóirí labhairt lena chéile ag deireadh an chomórtais agus a bheith aontaithe ar na buaiteoirí sula bhfógraítear an toradh. I láthair na huaire ní bhíonn an t-eolas seo ag na moltóirí.  

Céard is comhartha Oireachtas maith ann? 

Chuile dhuine a fheiceáil i ndea-ghiúmar agus iad ag baint sult as imeachtaí na féile. 

Céard iad na seifteanna atá agat le teacht slán as an Oireachtas? 

Níl aon seifteanna agam. Tagann ciall le haois! 

Cén tOireachtas ab fhearr leat agus cén fáth?  

Tá cuimhní geanúla agam ar Oireachtas 2000 i gCaisleán an Bharraigh.  Thiomáin mé féin agus mo dheirfiúr Máire suas Déardaoin agus bhí muid ansin go Domhnach. B’in an chéad bhliain ar ghlac mé páirt sna comórtais. Thug sé deis dom aithne a chur ar dhaoine agus cairde nua a dhéanamh.  

D’éirigh liom i gComórtas Sheáin Óig Uí Thuama oíche Déardaoin. Chiallaigh sé seo go raibh mé cáilithe le bheith páirteach i gComórtas na mBan Dé hAoine agus d’éirigh liom an dara háit a fháil ansin. Thug sé sin mé chuig Comórtas Chorn Uí Riada ar an Satharn.  

Ní raibh súil ar bith agam leis seo agus ní raibh tada cóiriúil le caitheamh agam chun dul ar stáitse i gCorn Uí Riada.  Chaith mé féin agus roinnt de mo chairde an lá Dé Sathairn ag siúl Chaisleán an Bharraigh ag siopadóireacht. Ní dhéanfaidh mé dearmad go deo air! Is mór an mhaith gur athraíodh na rialacha agus go dtugtar bliain do dhaoine anois ó cháilíonn siad! 

Beidh Oireachtas 2002 i nGaoth Dobhair, Oireachtas 2015 sa Citywest agus Oireachtas 2022 i gCill Airne daingnithe i mo chuimhne go deo. Ba mhór an onóir dom glacadh le Corn Uí Riada, ábhar bróid dom féin agus do mo mhuintir. Fanfaidh na cuimhní iontacha sin liom go brách.