Deir an Rialtas go gcuirfear ar fáil leagan Gaeilge den Phlean Forbartha Náisiúnta sna laethanta amach romhainn.
I mBéarla amháin a foilsíodh an t-athbhreithniú ar an bPlean Forbartha Náisiúnta an tseachtain seo caite.
Cháin Conradh na Gaeilge agus na Daonlathaithe Sóisialta an Rialtas as gan leagan Gaeilge den phlean a chur ar fáil in éineacht leis an leagan Béarla.
Dúirt urlabhraí ón Roinn Caiteachais Phoiblí le Tuairisc nár foilsíodh an leagan Gaeilge den phlean an tseachtain seo caite mar gur thóg an obair aistriúcháin níos faide ná mar a síleadh.
“Ó tharla gur aistriúchán teicniúil atá i gceist, tá sé ag tógáil beagáinín níos faide ná mar a síleadh.
“Foilseofar é sna laethanta amach romhainn.”
Rinneadh cáineadh géar ar an Rialtas as gan aon tagairt in aon chor a dhéanamh d’infheistíocht sa Ghaeilge agus sa Ghaeltacht san athbhreithniú ar an bPlean Forbartha Náisiúnta a foilsíodh an tseachtain seo caite.
Tá táblaí sa phlean ina ndéantar briseadh síos ar €102.4 billiún den airgead atá geallta a dháileadh ar na ranna rialtais éagsúla ach níl an Ghaeltacht fiú luaite i dteideal na Roinne a bhfuil an cúram sin uirthi.
An Roinn Forbartha Tuaithe agus Pobail atá déanta den Roinn Forbartha Tuaithe agus Pobail agus Gaeltachta sa phlean.
De réir an phlean €273 milliún sa bhliain a bheidh le caitheamh ag an Roinn Forbartha Tuaithe agus Pobail agus Gaeltachta idir 2026-2028 ach tiocfaidh laghdú air sin go dtí €255 milliún sa bhliain in 2029 agus 2030.
An t-aon áit a bhfuil an focal Gaeltacht luaite sa phlean nua ná i bhfonóta faoi aistriú cumhachtaí ranna éagsúla i ndiaidh an toghcháin dheireanaigh.
Colm Ó Cathasaigh
Léiríonn sé easpa measa ar a laghad. Ní haon ionadh an meon ar ba chuma leo i ndiaidh Leo ach mo náire Micheál Martin.
Cad tá le rá ag an Comisnéir Teanga?
Seanán Ó Coistín
Is cruthú é sin nach bhfuil aon tábhacht pholaitiúil leis an nGaeilge. Cé go bhfuil sé leagtha amach i mBunreacht na hÉireann gurb í an Ghaeilge chéad teanga oifigiúil an stáit, ní sin an fhírinne.
Ba cheart do dhaoine cás cúirte a ghlacadh faoi seo chun dúshlán an rialtais a thabhairt.
Pól Ó Braoin
Níl na vótaí ag lucht an Ghaeilge a úsáid agus sin sin. Mionlach beag bídeach muid. Beidh an dream úd i gcumacht go dtí go gcuirfidh siad deireadh leis an nGaeilge mar theanga phobail. Ní bheidh na daoine go mbíonn an Ghaeilge mar chaitheamh aimsire acu ag iarraidh cearta an oiread sin ná ag iarraidh crá croí ar son na teanga a dhéanamh astu féin.