Béarla á chur ar shloinnte Gaeilge ar litreacha ó Eircode

Tá sé tagtha chun solais go bhfuil Eircode ag cur Béarla ar shloinnte Gaeilge sna litreacha ina bhfuil na cóid nua phoist á ndáileadh ar mhuintir na hÉireann.

Thaispeáin an t-amhránaí clúiteach as Corca Dhuibhne, Muireann Nic Amhlaoibh, pictiúr den chlúdach litreach a fuair sí inné ó Eircode ar a raibh leagan Béarla dá sloinne. Dúirt Nic Amhlaoibh nár úsáid sí an leagan sin dá sloinne riamh. ‘Cé hiad na daoine seo? English names on our #eircode address. We NEVER use the anglicised version!,” a dúirt Nic Amhlaoibh.

Tharla an rud ceannann céanna do Mhartán Ó Ciardha i nGaeltacht Chois Fharraige maidin inniu. Tháinig litir tríd an doras chuige agus Béarla curtha ar a shloinne ag Eircode ar an gclúdach litreach.

“Bhreathnaigh mé ar an litir a tháinig ar maidin agus chonaic mé M. Carey scríofa uirthi. Níl aon cháipéis agam a bhfuil sloinne mar sin air, ó theastas breithe agus cáipéisí scoile go mo phas agus cuntas bainc agus cáipéisí oibre. Níl a fhios agam cén chaoi nó cén fáth ar chuir siad ar an litir seo é,” a dúirt Ó Ciardha le Tuairisc.ie.

Ní hiad na sloinnte amháin a bhfuil Béarla á chur orthu ag Eircode ach seoltaí baile freisin. Dúirt Ó Ciardha gur cuireadh meascán idir Gaeilge agus Gaeilge Ghalldaithe ar an seoladh baile atá aige.

“Tá ‘Baile’ ann i nGaeilge, ach ansin tá ‘Donnellan’ i mBéarla agus ansin choinnigh siad orthu leis an nGaeilge arís don Spidéal agus Gaillimh. Mar sin, tá ‘Baile Donnellan, An Spidéal, Gaillimh’ ar an gclúdach agus gan chaint ar bith ar ‘contae’ ach an oiread,” a dúirt sé.

Nuair a seoladh an córas nua ag tús na seachtaine seo rinne Conradh na Gaeilge agóid taobh amuigh d’Óstán Shelbourne mar a raibh an ócáid seolta ar bun. Tá sé á mhaíomh ag an gConradh go bhfuil suas le 50,000 logainm Gaeilge mícheart, míchruinn nó in easnamh ar bhunachar Eircode.

Dúirt Julian de Spáinn, Ard-Rúnaí an Chonartha, go bhfuil iontas air faoi fhadhb nua seo na sloinnte Gaelacha.

“Cuireann sé iontas orainn go bhfuil Eircode ag úsáid ainmneacha ar chor ar bith. An tuiscint a bhí againne air ná go mbeadh an focal ‘An tÁititheoir’ i nGaeilge agus ‘The Occupier’ i mBéarla agus sin é. Ní raibh siad le hainmneacha ná sloinnte a úsáid,” a dúirt de Spáinn le Tuairisc.ie.

D’fhiosraigh Tuairisc.ie an scéal leis an Roinn Cumarsáide agus Capita, an comhlacht a dhear Eircode don Roinn, agus ar deireadh dúradh linn gur le An Post a bhain an scéal.

Dúirt urlabhraí ó Eircode le Tuairisc.ie gur bunachar An Post a úsáideadh i gcás seoltaí atá cosúil lena chéile ach nach bhfuil aon teacht ag Eircode ar an mbunachar sin. Dúradh freisin go bhfuil Eircode sásta aon sonraí ceartaithe a fhaightear a chur ar aghaidh chuig An Post go gceartófar an bunachar atá acu sin.

Dúirt An Post féin gur fabhtanna teicniúla ba chúis le haistriú na sloinnte.

“Mar gheall ar mhéid an togra, d’fhéadfadh sé go raibh roinnt bheag fabhtanna teicniúla ann. Tá An Post ag seachadadh litreacha agus pacáistí i nGaeilge le fada an lá agus tá muid breá sásta é sin a dhéanamh. Is cinnte nach d’aon turas a cuireadh Béarla ar ainm nó ar shloinne aon duine ar na litreacha seo,” a dúirt urlabhraí An Post le Tuairisc.ie.